Toshkent shahrida reklama konstruksiyalarini noqonuniy buzib tashlash ishlari davom etmoqda. Bugungi kunda 700 dan ortiq reklama bannerlari olib tashlangan. Humo Media agentligi 20 ga yaqin banneridan ayrilgan, deb xabar beradi “Podrobno”.
“Biznes sekin-asta to‘xtayapti. Hozirda Shota Rustaveli va Yangi Sergeli ko‘chalaridagi bannerlar buzilmoqda. Yaxshi holatda boltlarni kesishmoqda va bilbordni omborga olib ketish mumkin. Lekin konstruksiyalarning ekskavatorlar yordamida buzib, mulkka zarar yetkazish holatlari ham uchrab turibdi. Tadbirkorlar hatto hujjatlar va pasport bilan ham biror nimaga erisha olmayapti. Eng muhimi, mazkur vaziyatda mahalliy hokimiyat tomonidan hech qanday hujjat taqdim etilmayapti. Ekskavator kovshlari bilan mulkimizga zarar yetkazib, buni qonuniy harakat deyishmoqda”, — deydi Humo Media direktori Saveliy Sokolov.
Vazirlar Mahkamasining 2020-yil 20-fevraldagi “Tashqi reklama bozorini tartibga solish to‘g‘risida”gi qarori bilan reklama bannerlarini talablarga mos ravishda sozlash, shuningdek, shaharning markaziy ko‘chalaridagi an’anaviy konstruksiyalarni yorug‘lik diodli ekranlarga almashtirish talab etiladi. Ushbu ko‘chalar ro‘yxati poytaxt hokimligi tomonidan tasdiqlanadi. Sokolovning so‘zlariga ko‘ra, hokimiyat vakillaridan biror kim reklamachilarga ushbu ro‘yxatni taqdim etmagan.
“Biroq nima bo‘lganda ham reklama bannerini olib tashlash uchun sud qarori kerak. Mazkur qarorni ishlab chiqish vaqtida ayrim shaxslar sudning reklama konstruksiyalarini buzish jarayonida ishtirokini chiqarib tashlashni talab qilgandi. Umuman olganda, hukumat shundoq ham usiz harakat qilishga qaror qildi”, — deya ta’kidlaydi Humo Media direktori.
Reklama konstruksiyalari tadbirkorlarning xususiy mulki hisoblanadi. Uning ma’lum qilishicha, “Xususiy mulkni himoya qilish va mulkdorlar huquqlarining kafolatlari to‘g‘risida”gi qonunga murojaat qilinadigan bo‘lsa, bilbordlarni buzish orqali keltirilgan zarar qoplab berilishi kerak. Ammo o‘z mulkini himoya qilish uchun kelgan tadbirkorlarga “tepadagi” noma’lum shaxslarning buyrug‘ini bajarib, o‘zlarining xatti-harakatini hatto aniq asoslab bera olishmayotgan bir paytda qanaqa kompensatsiya haqida gap bo‘lishi mumkin?
Sokolovning so‘zlariga ko‘ra, reklama bannerlarini buzishda turli bahonalardan foydalanilmoqda. Birinchi navbatda bannerlarni buzayotganlar ushbu konstruksiyaning noqonuniyligini asoslashga urinmoqda. Biroq tegishli hujjatlar namoyish etilgandan so‘ng ular LED-ekran o‘rnatish to‘g‘risidagi farmon talablari bajarilmaganini ko‘rsatmoqda. Ayrim ko‘chalarda LED-displeylar o‘rnatish talab etilmasligi ta’kidlangan holatlarda esa ular shunchaki yelka qisyapti.
“Ichki ishlar ushbu vaziyatga hech qanday chora ko‘rmayapti. Huquq-tartibot organlari xodimlari chaqiruv reklama bannerlarining buzilishiga bog‘liq ekanligini bilgach, arizani shunchaki bekor qilib, ketib qolmoqda yoki o‘zingni jamoat tartibini buzganing uchun olib ketyapti. Mazkur buzilishlarga qonuniy baho berishni so‘rab Bosh prokuraturaga murojaat qildim. Javobini kutyapman. Ijoyib javob bo‘lmasa, keyingi instansiya sud bo‘ladi”, — deydi Saveliy Sokolov.
“Shaxsan o‘zim bozorni tartibga solish, shaharni tozalash tarafdoriman. Toshkentda juda ko‘p noqonuniy konstruksiyalar, chiqindilar bor. Ammo keling, barchasini rasmiy, qonun va hujjatlarga asosan, boshqa variantlarni taqdim etgan holda amalga oshiraylik”, — deydi Humo Media rahbari.
Mavzuga doir: Toshkentdagi tashqi reklama obyektlari nega buzilmoqda? Har bir soha mutasaddilari bunga javob berdi
Savdo-sanoat palatasi reklama bannerlari nima sababdan buzilayotganiga oydinlik kiritish maqsadida Toshkent hokimligiga so‘rov yubordi. Monopoliyaga qarshi kurashish qo‘mitasi Toshkent shahrida joylashgan 6630 ta konstruksiyaning 3207 tasi yoki 50 foizga yaqinida kamchilik aniqlanganini ma’lum qildi.
Aprel oxirlarida Toshkent shahar hokimi o‘rinbosari Furqat Mahmudxo‘jayev huquq-tartibot idoralari poytaxtda noqonuniy reklama konstruksiyalari paydo bo‘lgani, lekin bunga hech kim e’tibor bermaganiga huquqiy baho berishi kerakligini aytgandi.
Izoh (0)