Тошкентнинг Юнусобод туманида жойлашган «Шаҳидлар хотираси» мажмуаси реконструкция қилиниши маълум бўлганди. «Gazeta.uz» бунинг учун қайси компаниялар танлаб олинганини аниқлади.
Тошкентдаги «Шаҳидлар хотираси» мажмуаси ва унга туташ боғ ҳудудини реконструкция қилиш режалаштирилаётгани тўғрисида апрель ойида маълум бўлганди. Пойтахт ҳокимлиги Вазирлар Маҳкамасининг тегишли қарорига асосан қурилиш-таъмирлаш ва ободонлаштириш ишлари 2021 йилда амалга оширилиши белгиланганини маълум қилганди. Ҳужжат жамоатчилик учун очиқ ҳолатда эмас («Gazeta.uz»нинг икки манбасига кўра, ҳужжат «Хизматда фойдаланиш учун» грифи остида).
Ҳокимият ҳудуддаги дарахтларга зарар етказмаган ҳолда рамзий ротондани реконструкция қилиш ва қатағон қурбонларининг номлари акс этган рамзий китоб барпо этишни ваъда қилган. Бундан ташқари, музей ходимлари учун алоҳида маъмурий бино, аҳоли учун маиший хизмат бинолари, савдо дўконлари, кафе ва очиқ амфитеатр қурилади.
Қурилиш вазири Ботир Зокировнинг айтишича, «мажмуа айни вақтда жудаям ночор ҳолатда». Унинг сўзларига кўра, янги пиёдалар йўлаклари, велойўлаклар, велопрокат ва катта автотураргоҳ пайдо бўлади. Апрель ойи охирларида мажмуа реконструкциясининг дастлабки лойиҳаси тақдим этилганди.
Лойиҳада иштирок этадиган компаниялар тўғрисидаги маълумотлар давлат харидлари порталида келтирилган. Улар Тошкент шаҳар ҳокимлиги ҳузуридаги «Ягона буюртмачига хизмат кўрсатиш» инжиниринг компаниясининг қурилиш лойиҳаларининг манзилли рўйхатида кўрсатилган. Лойиҳа ҳокимият бюджет даромадининг ошириб бажарилган қисми ҳисобидан молиялаштирилади.
Мажмуа, шу жумладан, ротонда реконструкцияси, қатағон қурбонларининг номлари акс этган рамзий китоб барпо этиш, музей ходимлари учун алоҳида маъмурий бино, савдо дўконлари, очиқ амфитеатр қуриш, Wи-Фи ҳудудлари ва бошқа объектларни барпо этиш учун Mimar Group компанияси танланган.
«Қатағон қурбонлари хотираси» давлат музейини реконструкция қилиш учун эса «Ижод-Ижод» хусусий корхонаси танланган.
Ушбу компаниялар танланганига Вазирлар Маҳкамасининг 2021 йил 3 апрелдаги 178-сон қарори асос қилиб кўрсатилган. Ушбу қарор билан 2021 йил 1 сентябргача лойиҳа-смета ҳужжатларини ишлаб чиқиш билан бирга қурилиш-монтаж ишларини бажаришга рухсат берилган. Объектларнинг қиймати лойиҳа-смета ҳужжатлари ишлаб чиқилгандан сўнг аниқланади.
Таққослаш учун, ушбу рўйхатдан Олмазор тумани мудофаа ишлари бошқармаси учун маъмурий бинони реконструкция қилиш ва қуриш билан шуғулланадиган компания 2020 йил 4 декабрдаги тендер протоколи асосида аниқланган.
Mimar Group ҳақида
Компания сайтида келтирилган маълумотларга кўра, Mimar Group — 2020 йилда ташкил этилган ва турар жойлар қурилишидан тортиб саноат ва ижтимоий объектларни қуришгача йирик шаҳарсозлик лойиҳаларини амалга оширишга ихтисослашган хусусий қурилиш компанияси.
Корхоналар ва ташкилотлар ягона давлат регистри маълумотларига кўра, компания 2020 йилнинг июль ойида рўйхатдан ўтган, асосий фаолият турар жой биноларини қуришдир. Таъсисчилари этиб Алишер Абдубоситович Ғаниев (56,75 фоиз) ва Козимбек Ўткирович Яминов (43,25 фоиз), раҳбари этиб Ферузбек Давронов кўрсатилган.
Компания, шунингдек, 71 гектар майдонда Tashkent Index савдо-ишлаб чиқариш мажмуасини қуриш лойиҳасини амалга оширади.
«Ижод-Ижод» компанияси ҳақида
Корхоналар ва ташкилотлар ягона давлат регистри маълумотларига кўра, бу компания 1996 йил май ойида рўйхатдан ўтган, асосий фаолияти яшаш учун мўлжалланмаган бинолар қуриш бўлган хусусий корхона. Таъсисчиси сифатида Алишер Раҳимович Раҳмонов (100 фоиз), раҳбари сифатида Бахтиёр Раҳмонов кўрсатилган.
Изоҳ (0)