Toshkentning Yunusobod tumanida joylashgan “Shahidlar xotirasi” majmuasi rekonstruksiya qilinishi ma’lum bo‘lgandi. “Gazeta.uz” buning uchun qaysi kompaniyalar tanlab olinganini aniqladi.
Toshkentdagi “Shahidlar xotirasi” majmuasi va unga tutash bog‘ hududini rekonstruksiya qilish rejalashtirilayotgani to‘g‘risida aprel oyida ma’lum bo‘lgandi. Poytaxt hokimligi Vazirlar Mahkamasining tegishli qaroriga asosan qurilish-ta’mirlash va obodonlashtirish ishlari 2021-yilda amalga oshirilishi belgilanganini ma’lum qilgandi. Hujjat jamoatchilik uchun ochiq holatda emas (“Gazeta.uz”ning ikki manbasiga ko‘ra, hujjat “Xizmatda foydalanish uchun” grifi ostida).
Hokimiyat hududdagi daraxtlarga zarar yetkazmagan holda ramziy rotondani rekonstruksiya qilish va qatag‘on qurbonlarining nomlari aks etgan ramziy kitob barpo etishni va’da qilgan. Bundan tashqari, muzey xodimlari uchun alohida ma’muriy bino, aholi uchun maishiy xizmat binolari, savdo do‘konlari, kafe va ochiq amfiteatr quriladi.
Qurilish vaziri Botir Zokirovning aytishicha, “majmua ayni vaqtda judayam nochor holatda”. Uning so‘zlariga ko‘ra, yangi piyodalar yo‘laklari, veloyo‘laklar, veloprokat va katta avtoturargoh paydo bo‘ladi. Aprel oyi oxirlarida majmua rekonstruksiyasining dastlabki loyihasi taqdim etilgandi.
Loyihada ishtirok etadigan kompaniyalar to‘g‘risidagi ma’lumotlar davlat xaridlari portalida keltirilgan. Ular Toshkent shahar hokimligi huzuridagi “Yagona buyurtmachiga xizmat ko‘rsatish” injiniring kompaniyasining qurilish loyihalarining manzilli ro‘yxatida ko‘rsatilgan. Loyiha hokimiyat budjet daromadining oshirib bajarilgan qismi hisobidan moliyalashtiriladi.
Majmua, shu jumladan, rotonda rekonstruksiyasi, qatag‘on qurbonlarining nomlari aks etgan ramziy kitob barpo etish, muzey xodimlari uchun alohida ma’muriy bino, savdo do‘konlari, ochiq amfiteatr qurish, Wi-Fi hududlari va boshqa obyektlarni barpo etish uchun Mimar Group kompaniyasi tanlangan.
“Qatag‘on qurbonlari xotirasi” davlat muzeyini rekonstruksiya qilish uchun esa “Ijod-Ijod” xususiy korxonasi tanlangan.
Ushbu kompaniyalar tanlanganiga Vazirlar Mahkamasining 2021-yil 3-apreldagi 178-son qarori asos qilib ko‘rsatilgan. Ushbu qaror bilan 2021-yil 1-sentabrgacha loyiha-smeta hujjatlarini ishlab chiqish bilan birga qurilish-montaj ishlarini bajarishga ruxsat berilgan. Obyektlarning qiymati loyiha-smeta hujjatlari ishlab chiqilgandan so‘ng aniqlanadi.
Taqqoslash uchun, ushbu ro‘yxatdan Olmazor tumani mudofaa ishlari boshqarmasi uchun ma’muriy binoni rekonstruksiya qilish va qurish bilan shug‘ullanadigan kompaniya 2020-yil 4-dekabrdagi tender protokoli asosida aniqlangan.
Mimar Group haqida
Kompaniya saytida keltirilgan ma’lumotlarga ko‘ra, Mimar Group — 2020 yilda tashkil etilgan va turar joylar qurilishidan tortib sanoat va ijtimoiy obyektlarni qurishgacha yirik shaharsozlik loyihalarini amalga oshirishga ixtisoslashgan xususiy qurilish kompaniyasi.
Korxonalar va tashkilotlar yagona davlat registri ma’lumotlariga ko‘ra, kompaniya 2020-yilning iyul oyida ro‘yxatdan o‘tgan, asosiy faoliyat turar joy binolarini qurishdir. Ta’sischilari etib Alisher Abdubositovich G‘aniyev (56,75 foiz) va Kozimbek O‘tkirovich Yaminov (43,25 foiz), rahbari etib Feruzbek Davronov ko‘rsatilgan.
Kompaniya, shuningdek, 71 gektar maydonda Tashkent Index savdo-ishlab chiqarish majmuasini qurish loyihasini amalga oshiradi.
“Ijod-Ijod” kompaniyasi haqida
Korxonalar va tashkilotlar yagona davlat registri ma’lumotlariga ko‘ra, bu kompaniya 1996-yil may oyida ro‘yxatdan o‘tgan, asosiy faoliyati yashash uchun mo‘ljallanmagan binolar qurish bo‘lgan xususiy korxona. Ta’sischisi sifatida Alisher Rahimovich Rahmonov (100 foiz), rahbari sifatida Baxtiyor Rahmonov ko‘rsatilgan.
Izoh (0)