Татаристоннинг Набережний Челни шаҳридаги қурилиш майдончасида ўзбекистонлик талаба бешинчи қаватдан йиқилиб, ҳалок бўлди. Бу ҳақда Татаристон прокуратураси матбуот хизматига таяниб, «Россия Татаристан» хабар берди.
Фожиа 21 май куни эрталаб соат 10:00 ларда 33-микрорайондаги қурилиш майдонида юз берган. Маълум қилинишича, вафот этган йигит — Ўзбекистондан ўқишга келган 21 ёшли Челни университетининг талабаси. Йигит бир кун олдин қурилиш компаниясида вақтинча ишчи сифатида ишга жойлашган. У икки кун давомида стажировкадан ўтиши керак бўлган.
Шаҳар прокурорининг биринчи ўринбосари Челнов Айдар Галиев воқеа жойига етиб борган. Ҳозирда фожианинг сабаблари аниқланмоқда. Жиноят ишини қўзғатиш масаласи ҳал қилинмоқда.
Бундан аввал Россияга кетиб, 18 йил бедарак йўқолган Ўзбекистон фуқароси ватанга қайтарилгани, Россияда бахтсиз ҳодисага учраган ўзбекистонлик она ва болага ёрдам кўрсатилгани ҳамда Россияда босқинчилик ҳаракатларини амалга оширган тўрт нафар ўзбекистонлик суд қилиниши ҳақида хабар берилганди.
Изоҳ (0)