«Тошкент беш ташаббус ҳаракати» доирасида ёшлар билан очиқ мулоқотда бош вазир маслаҳатчиси Олимжон Умаров интернет тезлиги ҳақидаги масалага тўхталиб ўтди. Бу ҳақда «Дарё» мухбири хабар бермоқда.
«Мен сеҳргар эмасман, интернет тезлигини ошириб юбора олмайман. Бироқ бу борада ишлар олиб борилмоқда, қиладиган ишлар бор ҳали» — дея таъкидлади у.
Олимжон Умаровнинг сўзларига кўра, Ўзбекистонда сўнгги бир неча йил ичида интернет нархи арзонлашди.
Сунъий йўлдош орқали интернет узатиш ҳақидаги саволга эса, бундай интернет алоқа қиммат ва барқарор эмаслигини, энг барқарор интернет — оптик толали алоқа эканини таъкидлаган.«2015 йилда бутун республика бўйлаб 2 минг километр узунликдаги оптик толали кабеллар тортилди, жорий йилда 50 минг километр кабел тортиш режалаштирилган. 1 июндан бошлаб алоқа операторлари учун интернет нархи ўзгаради, нархлар яна 15 фоизга пасаяди.
Яна бир муҳим жиҳат — илгари ‘тезлик 4 МБгача’ деб ёзишарди. Энди ўша ‘гача’ деган жойи бўлмайди. Агар сиз интернет учун 100 минг сўм тўласангиз, сиз хизматларнинг бутун ҳажми учун тўлаган бўласиз. Агар секундига 10 МБ ёзилган бўлса, демак, худди шунча тезлик бўлиши керак» — дея қайд этди у.
Эслатиб ўтамиз, Шавкат Мирзиёев 2021 йил 22 апрель куни ўтказилган видеоселектор йиғилишида Олимжон Умаров, ахборот технологиялари ва коммуникацияларини ривожлантириш вазири Шуҳрат Содиқовга интернет хизматлари ҳажмини камида 2 бараварга ошириш топшириғини берганди.
Олимжон Умаров Ўзбекистон бош вазирининг маслаҳатчиси сифатида 2020 йилнинг май ойида иш бошлаган. Унга қадар 2017 йилдан буён ахборот технологиялари ва коммуникацияларини ривожлантириш вазирининг биринчи ўринбосари лавозимида ишлаб келган.
Изоҳ (0)