Ўзбекистонга йил бошидан буён 156 та электромобил импорт қилинди. Бу бутун 2020 йил давомида олиб келинган миқдордан кўп

Давлат статистика қўмитаси маълумотларига кўра, 2021 йилнинг январь—апрель ойларида Ўзбекистонга хориждан 156 та электромобил импорт қилинган. Бу кўрсаткич ўтган йилнинг мос даврига нисбатан 138 тага кўп.

Маълум қилинишича, 2021 йилнинг апрель ойида 65 та электромобил импорт қилинган.

Ўзбекистон электромобилларни асосан Хитойдан импорт қилган — 119 та. Иккинчи ўринда Туркия (24) жойлашган бўлса, учинчи поғонадан Жанубий Корея ва АҚШ ўрин олган (4 тадан).

Йил бошидан буён импорт қилинган электромобиллар учун 3,4 миллион АҚШ доллари сарфланган.

Spot’нинг PlugShare маълумотларига таяниб ёзишича, бугунги кунда Ўзбекистонда электромобиллар учун 15 та қувватлантириш станцияси мавжуд. Улардан биринчиси Фарғонада очилган бўлса, Тошкентда бутун бошли тармоқ яратиш ишлари олиб борилмоқда — бу билан ТокБор ва Makro шуғулланяпти.

2019 йилдан буён мамлакатга электромобилларни олиб киришда имтиёзлар амал қилмоқда — божхона божи ва акциз солиғи тўланмайди. Ҳозирда уларни автотранспорт йиғимидан ҳам озод этиш масаласи кўриб чиқилмоқда.

Аввалроқ Ўзбекистондаги бир нечта компаниялар 2021—2023 йилларда автомобиллар, пикаплар, юк машиналари, микроавтобуслар ва бошқа автомобилларни ишлаб чиқариш ва йиғишни йўлга қўймоқчи эканлиги ҳақида хабар берилган эди. Президент йилига 50-60 минг дона ҳамёнбоп автомобиллар ва электромобиллар ишлаб чиқаришни йўлга қўйиб, автомобиль саноати учун сармоя киритиш зарурлигини таъкидлаган эди.