Канаданинг марказий Манитоба провинциясида ўрмон ёнғини содир бўлмоқда. Бир нечта ҳудудларнинг ҳукуматлари маҳаллий аҳолини зудлик билан эвакуация қилишни бошлади. Ўт ўчирувчилар оловнинг энг камида 12 та ўчоғини аниқлади, бу ёнғинларнинг даражаси ўта хавфли ҳисобланади, деб ёзмоқда The Watchers.
Энг катта ёнғин Манитобанинг Хомбрук жамиятида бўлиб, олов 14,4 минг гектар майдонни қамраб олди, унинг узунлиги 80 километр, эни 16 километрни ташкил қилди.
Шунингдек, Манитобанинг марказий қисмида жойлашган Спрус-Вудс истироҳат боғидаги олов 5,6 минг гектар майдонга ёйилди. Маҳаллий ҳукумат фавқулодда ҳолат эълон қилди.
Ҳукумат фуқаролардан хавфли ҳудудлардан кетишни ва табиий офатни суратга олмасликни сўрамоқда, чунки бу хавфли бўлиб, қутқарувчилар ишига халақит бериши мумкин.
Аввалроқ Мексикада шимолий Коуэла ва Нуэво-Леон штатлари чегарасида содир бўлаётган йирик ўрмон ёнғини туфайли 1100 киши эвакуация қилингани ҳақида хабар берилганди. Ёнғин оқибатида тахминан 8 минг гектар, жумладан, Коуэла шаҳридаги 3,8 минг гектарга яқин ўрмон йўқ қилинган.
Эслатиб ўтамиз, 21 февраль куни Жанубий Кореянинг жануби-шарқий қисмида кенг миқёсли ўрмон ёнғини бошланган эди. Ёнғин Андонг ва Ечон шаҳарлари яқинидаги тахминан 255 гектар ўрмонни йўқ қилган.
Rainforest Foundation Norway нодавлат ташкилоти тадқиқотларига кўра, 2002 йилдан 2019 йилгача инсониятнинг фаолияти 600 минг квадрат километр ўрмонни вайрон қилди, бу деярли Франция ҳудуди билан тенг майдон ҳисобланади. Кўп йиллик тропик ўрмонларнинг 34 фоизи йўқ қилинди ва яна 30 фоизи чириб, нобуд бўлган.
Изоҳ (0)