Kanadaning markaziy Manitoba provinsiyasida o‘rmon yong‘ini sodir bo‘lmoqda. Bir nechta hududlarning hukumatlari mahalliy aholini zudlik bilan evakuatsiya qilishni boshladi. O‘t o‘chiruvchilar olovning eng kamida 12 ta o‘chog‘ini aniqladi, bu yong‘inlarning darajasi o‘ta xavfli hisoblanadi, deb yozmoqda The Watchers.
Eng katta yong‘in Manitobaning Xombruk jamiyatida bo‘lib, olov 14,4 ming gektar maydonni qamrab oldi, uning uzunligi 80 kilometr, eni 16 kilometrni tashkil qildi.
Shuningdek, Manitobaning markaziy qismida joylashgan Sprus-Vuds istirohat bog‘idagi olov 5,6 ming gektar maydonga yoyildi. Mahalliy hukumat favqulodda holat e’lon qildi.
Hukumat fuqarolardan xavfli hududlardan ketishni va tabiiy ofatni suratga olmaslikni so‘ramoqda, chunki bu xavfli bo‘lib, qutqaruvchilar ishiga xalaqit berishi mumkin.
Avvalroq Meksikada shimoliy Kouela va Nuevo-Leon shtatlari chegarasida sodir bo‘layotgan yirik o‘rmon yong‘ini tufayli 1100 kishi evakuatsiya qilingani haqida xabar berilgandi. Yong‘in oqibatida taxminan 8 ming gektar, jumladan, Kouela shahridagi 3,8 ming gektarga yaqin o‘rmon yo‘q qilingan.
Eslatib o‘tamiz, 21-fevral kuni Janubiy Koreyaning janubi-sharqiy qismida keng miqyosli o‘rmon yong‘ini boshlangan edi. Yong‘in Andong va Yechon shaharlari yaqinidagi taxminan 255 gektar o‘rmonni yo‘q qilgan.
Rainforest Foundation Norway nodavlat tashkiloti tadqiqotlariga ko‘ra, 2002-yildan 2019-yilgacha insoniyatning faoliyati 600 ming kvadrat kilometr o‘rmonni vayron qildi, bu deyarli Fransiya hududi bilan teng maydon hisoblanadi. Ko‘p yillik tropik o‘rmonlarning 34 foizi yo‘q qilindi va yana 30 foizi chirib, nobud bo‘lgan.
Izoh (0)