20 май ҳолатига, дунёда коронавирусни юқтириб олганлар сони 164 917 999 кишига етди. Касалланганлар сони бўйича юқори бешликдан, доимгидек, АҚШ (33 миллион киши), Ҳиндистон (25,7 миллион), Бразилия (15,8 миллион), Франция (5,9 миллион) ва Туркия (5,1 миллион) ўрин олиб турибди. COVID-19 оқибатидаги ўлимлар сони эса бутун дунёда 3 418 023 тани ташкил қилмоқда.
Кембриж герцоги, шаҳзода Уильям коронавирусга қарши вакцинанинг биринчи дозаси билан эмланди. Бу ҳақда у ўзининг Twitter саҳифасида маълум қилди.
У айнан қайси компания дориси билан эмланганига аниқлик киритмади. Британияда 2020 йил 8 декабрдан Pfizer/BioNTech вакцинаси ёрдамида оммавий эмлаш бошланганди, 2021 йил 4 январда эса AstraZeneca вакцинаси ҳам муомалага киритилганди.
Шаҳзода Уильям 2020 йил апрелидаёқ коронавирус билан касалланиб ўтган, ўша вақтда унда нафас олиш билан боғлиқ муаммолар юзага келган эди. Шундан кейин кўп ўтмай, унинг отаси, шаҳзода Чарльзда ҳам вирус аниқланган.
Буюк Британия қироличаси Елизавета II январь бошида вакцина олган эди.
Қозоғистонда COVID-19’га қарши эмлангандан кейин кўп ўтмай ўлим юз бериши билан боғлиқ тўртта ҳолат қайд этилган. Бу ҳақда мамлакат соғлиқни сақлаш вазири ўринбосари маълум қилди.Шунингдек, коронавирусга қарши вакцинанинг иккинчи дозасини олганлар орасида коронавирусни юқтириб олиш билан боғлиқ 104 та ҳолат аниқланган. Таъкидланишича, беморларнинг барчаси вакцинация пайтида аллақачон вирусни юқтириб олган ҳолатда бўлган.
Умуман олганда Қозоғистонда биринчи дозадан кейин 541 киши COVID-19 билан касалланган, иккинчи дозадан кейин эса 104 та ҳолат қайд этилган.
Бу одамларнинг барчаси инкубация даврида — 14 кун ичида касаллангани айтилмоқда. «Яъни улар вирусни аллақачон юқтириб олганидан кейин эмланган», — дейилади хабарда.
Миср ҳукумати 19 май куни бўлиб ўтган мажлисда коронавирус пандемияси туфайли киритилган чеклов чораларини май охиригача узайтирди.Июнгача одамларнинг катта гуруҳ бўлиб тўпланиши, масалан, учрашувлар, конференциялар, тантаналар, маданий тадбирлар ўтказиш тақиқланади. Тўй ва туғилган кунларни фақат очиқ майдонларда нишонлаш мумкин.
Дўконлар, кафе, ресторанлар, театр ва бошқа маданий-кўнгилочар муассасалар 21:00 гача ишлаши мумкин.
Пандемия бошидан буён Мисрда қарийб 250 минг киши вирусга чалинган, шуларнинг 14 441 нафари вафот этган.
Мавзуга доир: Мисрда коронавирусга қарши эмлаш бошланди
- Буюк Британияда дунёда биринчи бўлиб коронавирусга қарши вакцинанинг учинчи дозаси самарадорлигини тадқиқ қилиш бошланди. Синовларда 2,8 минг нафар 30 ёшдан ошган шахслар иштирок этади. Тадқиқотлар бутун мамлакат бўйлаб 16 та шаҳардаги 18 та клиникада ўтказилади.
- Филиппин ҳукумати вакцинация марказларида таклиф этиладиган коронавирусга қарши вакциналар номларини одамларга олдиндан айтмасликка қарор қилди. Аммо одамлар ўзлари эмланадиган вакцина ҳақидаги маълумотдан маҳрум қилинмайди — дори ва унинг иккиламчи таъсирлари ҳақида уларга вакцинация пунктида маълумот берилади.
- АҚШ Pfizer компаниясининг коронавирусга қарши вакцинасини эритилганидан кейин ва инъекция олдидан суюлтиришдан аввал бир ойгача муддатда оддий совиткичда сақлашга рухсат берди. Шу пайтгача ушбу муддат беш кунга тенг эди. Вакцинани узоқ вақт сақлаш учун эса -70 °C шароит талаб қилинади.
Изоҳ (0)