Украина президенти Владимир Зеленский икки йилдан бери давом этаётган раҳбарлик фаолиятида сайловолди ваъдаларининг атиги 25 фоизини бажарди. Бу ҳақда Украина Сайловчилари қўмитаси матбуот хизматига таяниб «Известия» хабар берди.
Қўмита 19 май куни Украина раҳбарининг сайловлар бўйича бажарилмаган ваъдалари рўйхатини эълон қилди, унга кўра, 30 бандли ваъдаларнинг атиги саккизтаси қисман ёки тўлиқ бажарилган. Ташкилотнинг қайд этишича, тўлдирилган бандлар иккинчи даражали бўлиб, фуқароларнинг ҳаётига жиддий таъсир кўрсатмайди.
«Украина Сайловчилари қўмитаси Зеленскийнинг сайловолди дастури 30 банддан иборат экани, шундан 22 таси бажарилмагани, 8 таси қисман ёки тўлиқ бажарилганини аниқлади. Демак, дастур фақат 25 фоиз бажарилган. Амалга оширилган ваъдаларнинг аксарияти ‘иккинчи даражали’», — дейилади хабарда.
Рўйхатдан маълум бўлишича, Зеленский, гарчи бу унинг сайловдаги асосий ваъдаларидан бири бўлган бўлса-да, Донбассдаги можарони тугатмаган, Украинанинг «вақтинча босиб олинган ҳудудларини» қайтариб олмаган, мамлакатда бюрократияни соддалаштиришни амалга оширмаган, пенсия таъминотини кўпайтирмаган, пул топиш учун бошқа мамлакатларга кетган украиналикларни қайтариш мақсадига ва бошқа кўплаб ваъдаларга эришилмаган.
2020 йилнинг апрель ойида украиналик телебошловчи ва актриса Снежана Егорова президент Владимир Зеленскийни танқид қилиб, уни сайлов ваъдаларини бажармаганликда айблаган. Егорова Украина раҳбари ўз лавозими доирасида қобилиятсиз экани ва кинотеатрда очкўз амалдорларни қоралаш борасидагина уста эканини айтган.
2020 йил ноябрь ойида Зеленский ўзининг сайловолди дастурининг барча бажарилмаган бандларидан хабардор эканини айтди ва уларни бажаришга ваъда берди. Зеленский 2019 йил 21 апрелда бўлиб ўтган сайловларнинг иккинчи босқичида ғолиб чиқиб, Украина президентига айланган эди. Сайловчиларнинг 73 фоиздан ортиғи унга овоз берган.
Кейинчалик тантанали нутқ давомида сиёсатчи бошқа масалалар қатори, Донбассдаги можарони тугатишга ваъда берган, депутатлик дахлсизлигини бекор қилишга чақирган, Олий Радани тарқатиб юбориб, кўчиб кетган украиналикларни ўз ватанига чақирган.
Украинада кейинги президентлик сайловлари 2024 йилда бўлиб ўтади.
Изоҳ (0)