Европа Парламенти 19 май куни Европа Иттифоқи ва Туркия муносабатлари тўғрисидаги маърузани маъқуллади. Маърузада парламент Туркияни ХХ аср бошларида Усмонлилар империясида содир этилган арманлар геноцидини тан олишга чақирган, деб ёзади «РБК».
Ҳужжатда қайд этилишича, депутатлар Туркиянинг Греция ва Кипрга нисбатан «душманона ташқи сиёсати»дан, шунингдек, Сурия, Ливия ва Тоғли Қорабоғдаги можароларга аралашувидан хавотирда, чунки бу Европа Иттифоқининг устувор йўналишларига зид.
«Улар, шунингдек, Туркияни арманлар геноцидини тан олишга такрор чақириб, шу орқали турк ва арман халқлари ўртасида ҳақиқий ярашувга йўл очилишини таъкидлайди», — дейилади парламент хабарида.
Ҳужжатни 480 нафар депутат ёқлаган, 64 нафари унга қарши овоз берган ва 150 киши бетараф қолган. Парламентнинг ўзи арманлар геноцидини 1987 йилда тан олган эди.
Европа Парламенти кўп йиллардан бери Туркияни арманлар геноцидини тан олишга чақирмоқда. Хусусан, 2015 йилда парламент Европа Иттифоқида 24 апрель кунини Арманлар геноциди қурбонларини хотирлаш куни деб эълон қилиш тўғрисида резолюция қабул қилди ва Анқарага тегишли мурожаат юборди.
Бунга жавобан Туркия бундай чақириқлар Европа Иттифоқи билан муносабатларнинг ёмонлашувига олиб келиши мумкинлиги ҳақида огоҳлантирди.
Эслатиб ўтамиз, 24 апрель куни АҚШ президенти Жо Байден ХХ аср бошларида Усмонлилар империясида содир этилган этник арманларнинг қирғинини геноцид деб расман тан олди. Анқара Америка раҳбарини популист деб атади ва унинг баёнотини рад этди. Туркия президенти Ражаб Тоййиб Эрдўғон Байденнинг арманлар геноциди ҳақидаги баёнотини адолатсиз деб атади.
Арманистон бош вазири Никол Пашинян эса Байденга миннатдорлик билдириб, АҚШ мазкур геноцидни тан олганидан кейин тарихда содир бўлган ушбу фожиа ўз расмий тасдиғини топганини таъкидлаган.
Изоҳ (0)