Ўзбекистон мактабларида якуний имтиҳонлардан ўта олмаган ўқувчиларга икки ҳафта ўтгач қайта якуний аттестациядан ўтиш ҳуқуқи берилади. Бу ҳақда Халқ таълими вазирлиги ахборот хизмати раҳбари Лайло Рустамова маълум қилди.
Эслатиб ўтамиз, 26 майдан 2 июнга қадар мактабларда 5, 6, 7, 8 ва 10-синф ўқувчилари учун босқичли назорат имтиҳонлари, 26 майдан 15 июнга қадар эса 9 ва 11-синф битирувчилари учун якуний давлат имтиҳонлари ўтказилади. Имтиҳонлар оғзаки, ёзма ҳамда тест синовлари шаклида бўлиб ўтади.
Барча имтиҳонлар ўқувчиларнинг соғлиғини ҳимоялаш ва карантин қоидаларига қатъий риоя этган ҳолда ўтказилиши назоратга олинади. Жумладан, имтиҳонлар ўтказилишидан олдин таълим муассасаларида дезинфекция ишлари олиб борилади, ўқувчилар имтиҳонларга санитар-гигиена қоидаларига риоя этган ҳолда ҳимоя воситасида (тиббий ниқоб) киритилиб, бинога киришдан аввал тиббий ходимлар томонидан уларнинг тана ҳарорати ўлчанади ва оралиқ масофани сақлашлари таъминланади.
Агар мактаб карантинга ёпилган бўлса, имтиҳон карантин муддати тугаганидан сўнг, карантин қоидаларига қатъий риоя қилган ҳолда ўтказилади.
Йиллик баҳо ва якуний аттестация натижаларига кўра, умумий ўрта таълим давлат таълим стандартлари талабларини бажармай, «қониқарсиз» баҳо олган битирувчилар шу синфда қайта ўқишга қолдирилади.
Халқ таълими вазирлиги мактаб маъмуриятларидан имтиҳонларни адолатли ва шаффоф ташкил қилиш ҳамда турли ноқонуний йиғимларнинг олдини олиш чораларини кўришни сўраган.
2019/2020-ўқув йилида ушбу имтиҳонлар коронавирус инфекцияси туфайли бекор қилиниб, баҳолар учинчи чорак баллари асосида чиқарилганди.
Изоҳ (0)