Тошкент шаҳар ҳокимлиги ёшлар учун катта тадбир – Тошкент Беш ташаббус ҳаракатини ташкил этмоқда. Унинг доирасида 21 майдан 25 майга қадар маданий ва интеллектуал танловлар, спорт мусобақалари, медиатренинглар, пойтахтнинг машҳур кишилари билан учрашувлар ва бошқа тадбирлар бўлиб ўтади.
Дастурнинг ёрқин воқеалари сифатида Tashkent Dance Fest ва Tashkent Voice Fest рақс ҳамда вокал танловларини кўрсатиш мумкин. Улар бўйича олдиндан онлайн-саралаш ўтказилди. Хусусан, вокал ижро танлови бўйича қўшимча жонли эшитув уюштирилди. Унинг якунларига кўра, 200 нафар хоҳловчидан фақат 30 иштирокчи қолди.
Шунингдек, машҳур «Заковат» интеллектуал ўйини бўйича ҳам алоҳида турнир бўлиб ўтади. Унинг ташкилотчиси — Хушнудбек Худойбердиев.
Ёшлар фестивали учун махсус бунёд этилган шаҳарча ҳудудидаги махсус деворларда ёш рассомлар Street Art танлови доирасида ижодкорлик маҳоратини намойиш этади. Тадбир меҳмонлари ўзларига ёққан суратга овоз беришлари мумкин.
Спорт ихлосмандлари учун футбол, Street Ball, стол тенниси, армрестлинг ва Street Workout бўйича мусобақалар ташкил этилади. Бундан ташқари, ёшлар ўртасида замонавий бешкураш қоидалари асосида Laser Run мусобақаси бўлиб ўтади. Қолаверса, тадбир ҳудудида скейтер ва роллерлар учун скейт-парк ҳам барпо этилмоқда.
Project X идеатони ва Tashkent Cyber Cup 2021 мусобақасида ёш ИТ-мутахассислар ўз билим ва кўникмаларини кўрсатишади. Биринчи танловда иштирокчилар жамоаларга бўлинган ҳолда таълим ва инновациялар, ишсизликка қарши кураш, соғликни сақлаш ва экология йўналишларида лойиҳалар ишлаб чиқади ва энг яхши стартап тадбир ҳомийлари томонидан молиялаштирилади. Tashkent Cyber Cup 2021 мусобақасида эса иштирокчилар Counter-Strike: Global Offensive бўйича куч синашади. Ўйинлар тўққиз соатдан давом этади.
Фаол, замонавий ва мақсад сари интиладиган қизлар учун Аёллар нетворкинги ҳафталиги ўтказилади. Унда жамоалар илм-фан ва технологиялар (STEM), бизнес, ижтимоий соҳа ва арт бўйича лойиҳаларни тақдим этади. Бир вақтнинг ўзида ўқув тренинглари, спикерлар чиқишлари ва бошқалар ҳам бўлиб ўтади. Таклиф этилган мутахассислар танлов давомида қизларга устозлик қилади. Тақдимотлар якунларига кўра ғолиб жамоа аниқланади. У ҳомийларнинг молиявий кўмагига эга бўлади ва бу лойиҳани ҳаётга татбиқ қилиш имконини беради.
«Тошкент Беш ташаббус ҳаракати» меҳмонлари учун ҳам кўплаб тадбирлар режалаштирилган. Улар медиатренинглар, вазирлар, машҳур журналистлар, ёзувчилар, блогерлар, вайнерлар билан учрашувлар, қўлда ясалган буюмлар ярмаркаси ва модалар намойишига ташриф буюриши мумкин.
Ҳар бир кун машҳур дижейларнинг қайноқ мусиқий кечалари ва иштироки билан якунланади. DJ Trace, Roger Gunn, DJ Sam, DJ Niki, DJ Voynov ҳам DJ Endigo рақс майдонига байрамона кайфият бахш этади. 23 май куни 20:00да бутун Ўзбекистон бўйлаб турлар ташкил этишга улгурган «Электрооко» гуруҳининг икки соатли концерти бўлиб ўтади.
Рўйхатдан ўтган иштирокчилар ва меҳмонларнинг умумий сони 40 минг нафарга етди. Лекин меҳмонлар сони жуда кўп бўлиши кутилмоқда, чунки кириш учун олдиндан рўйхатдан ўтиш шарт эмас. Буни шундоққина кириш олдидан ҳам амалга ошириш мумкин.
Рўйхатдан ўтиш www.toshkent21.uz сайти орқали.
«Дарё» интернет-нашри «Тошкент Беш ташаббус ҳаракати»нинг медиа-ҳамкори ҳисобланади.
Изоҳ (0)