Ангренда 3,5 минг доллар эвазига Жисмоний тарбия университетига киритиб қўймоқчи бўлган шахс ушланди

Тошкент вилоятининг Ангрен шаҳрида ва пойтахтнинг Миробод туманида маълум миқдордаги пул эвазига ОТМга ўқишга киритиб қўймоқчи бўлган шахслар аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.

Маълум қилинишича, Ангрен шаҳрида Р.А. исмли фуқаро О.нинг ишончига кириб, уни 3,5 минг доллар эвазига танишлари орқали Жисмоний тарбия ва спорт университетига киритиб қўйишга ваъда берган. Олдиндан 1,5 минг долларни олган вақтда ашёвий далиллар билан ушланган.

Бундан ташқари, департамент ҳамда ДХХнинг Миробод тумани бўлимлари томонидан ўтказилган тезкор тадбирда фуқаро П.А. фуқаро С.ни танишлари орқали Москва давлат университетининг Тошкент шаҳридаги филиалига 1,5 минг доллар эвазига ўқишга киритиб қўймоқчи бўлгани аниқланган. Келишилган пулларни олган вақтда ашёвий далиллар билан ушланган.

Ушбу ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.

Аввалроқ Қорақалпоқ давлат университетига ўқишга киритиб қўйиш учун 5 минг доллар сўраган шахслар қўлга олингани, Самарқандда ҳарбий олийгоҳлар ва Темурбеклар мактабига ўқишга киритишини айтиб, фуқаролардан қарийб 10 500 доллар пул олган аёл ушлангани тўғрисида хабар берилганди.