Тошкент метрополитени қачонгача қисқартирилган вақт режимида ишлаши маълум бўлди

Тошкент метрополитени, тахминан, уч ой давомида қисқартирилган вақт режимида ишлайди. Бу ҳақда Транспорт вазирлиги матбуот хизмати раҳбари Наврўз Ашурматов «Podrobno.uz»га маълум қилди.

Эслатиб ўтамиз, 21 майдан бошлаб Тошкент метрополитенининг «Чилонзор» ва «Ўзбекистон» йўналишларининг иш тартиби вақтинча соат 06:00 дан 23:00 гача этиб белгиланади. Айни пайтда ушбу йўналишларда поездлар соат 05:00 дан 00:00 гача ҳаракатланмоқда.

«21 майдан бошлаб Тошкент метрополитенининг ‘Чилонзор’ ва ‘Ўзбекистон’ йўналишларининг иш тартиби вақтинча қисқартирилади. Бу икки йўналишда кенг кўламли профилактика ишлари бошланиши билан боғлиқ. Метрополитеннинг узлуксиз ишлашини таъминлаш ва йўловчиларга ортиқча ноқулайликлар туғдирмаслик учун профилактика ишлари ёзги мавсумда, йўловчилар ташиш ҳажми кескин пасайганда амалга оширилади», — деб таъкидлаган Наврўз Ашурматов.

Унинг айтишича, тасдиқланган режага кўра, профилактика чоралари уч ой ичида якунланиши керак. Ишлар якунланганидан кейин «Чилонзор» ва «Ўзбекистон» йўналишлари иш тартиби аввалги режимда тикланади.

«Тошкент метрополитени» ҳаракатланиш хизмати бошлиғи Султон Қодировнинг «Gazeta.uz»га маълум қилишича, «Чилонзор» йўналиши 1977 йилда, «Ўзбекистон» йўналиши эса 1984 йилда фойдаланишга топширилган. Йўналишлар ҳолати белгиланган стандартларга мувофиқлиги мунтазам равишда текшириб турилиши лозим.

Султон Қодиров метрополитен иши одатий иш тартибига қайтиши иш ҳажмига боғлиқлигини, аммо уни сентябрга қадар якунлаш кутилаётганини айтган. Мутахассиснинг таъкидлашича, бу ишларни метрополитеннинг амалдаги иш вақти (соат 00:00 дан 5:00 гача) доирасида ҳам амалга ошириш мумкин, аммо бунга кўпроқ вақт кетади.

Метрополитен вакили йўналишлар энди доим қисқартирилган вақт бўйича ишлаши борасидаги йўловчиларнинг хавотирларига чек қўйиб, бу икки йўналиш метрополитеннинг «юраги» эканлигини ва барча йўловчи ташувларининг, тахминан, 70 фоизи тўғри келишини таъкидлаган.

«Биз ҳатто ‘Юнусобод’ ва ерусти ҳалқа метро йўналишларини ҳам, агар бунга эҳтиёж бўлса,  янги ўқув йилигача соат 5:00 дан 00:00 гача ўтказиш масаласини кўриб чиқяпмиз», — деб қўшимча қилган Султон Қодиров.

Таъкидлаш жоизки, сўнгги пайтларда ижтимоий тармоқларда Тошкент метрополитени билан боғлиқ камчиликлар ҳақида кўп маротаба ёзиб келинмоқда. Хусусан, 18 май куни Сергели метросидаги бекатлардан бири 14 дақиқага электр таъминотидан узилиб қолди. 13 май куни «Амир Темур хиёбони» бекатида барча йўловчилар тушириб юборилганди, 7 май куни соат 21:10 дан 22:00 гача Тошкент метрополитени Ҳалқа йўлининг 7-бекатида электр энергияси ўчиб қолганди.

9 апрель куни ижтимоий тармоқларда поезднинг очиқ эшиклар билан ҳаракати туширилган видео тарқалди. Шу билан бирга, метрополитендаги ерости ва ерусти поезд ҳаракатларининг бир нечта бошқа видеолари ҳам ижтимоий тармоқларда кўп бора муҳокама қилинди. 28 апрель куни эса поезд туннелда тўхтаб қолгани, йўловчилар рельслар орқали ҳаракатланиб, бекатга етиб олгани тасвирланган видео тарқалди.

18 март куни эса «Олмазор» (Чилонзор йўли) ва «Бекат-1» (Сергели йўли) орасидаги туннелда икки поезд тўқнашганди.