Toshkent metropoliteni qachongacha qisqartirilgan vaqt rejimida ishlashi ma’lum bo‘ldi
Toshkent metropoliteni, taxminan, uch oy davomida qisqartirilgan vaqt rejimida ishlaydi. Bu haqda Transport vazirligi matbuot xizmati rahbari Navro‘z Ashurmatov “Podrobno.uz”ga ma’lum qildi.
Eslatib o‘tamiz, 21-maydan boshlab Toshkent metropolitenining “Chilonzor” va “O‘zbekiston” yo‘nalishlarining ish tartibi vaqtincha soat 06:00 dan 23:00 gacha etib belgilanadi. Ayni paytda ushbu yo‘nalishlarda poyezdlar soat 05:00 dan 00:00 gacha harakatlanmoqda.
“21-maydan boshlab Toshkent metropolitenining ‘Chilonzor’ va ‘O‘zbekiston’ yo‘nalishlarining ish tartibi vaqtincha qisqartiriladi. Bu ikki yo‘nalishda keng ko‘lamli profilaktika ishlari boshlanishi bilan bog‘liq. Metropolitenning uzluksiz ishlashini ta’minlash va yo‘lovchilarga ortiqcha noqulayliklar tug‘dirmaslik uchun profilaktika ishlari yozgi mavsumda, yo‘lovchilar tashish hajmi keskin pasayganda amalga oshiriladi”, — deb ta’kidlagan Navro‘z Ashurmatov.
Uning aytishicha, tasdiqlangan rejaga ko‘ra, profilaktika choralari uch oy ichida yakunlanishi kerak. Ishlar yakunlanganidan keyin “Chilonzor” va “O‘zbekiston” yo‘nalishlari ish tartibi avvalgi rejimda tiklanadi.
“Toshkent metropoliteni” harakatlanish xizmati boshlig‘i Sulton Qodirovning “Gazeta.uz”ga ma’lum qilishicha, “Chilonzor” yo‘nalishi 1977-yilda, “O‘zbekiston” yo‘nalishi esa 1984-yilda foydalanishga topshirilgan. Yo‘nalishlar holati belgilangan standartlarga muvofiqligi muntazam ravishda tekshirib turilishi lozim.
Sulton Qodirov metropoliten ishi odatiy ish tartibiga qaytishi ish hajmiga bog‘liqligini, ammo uni sentabrga qadar yakunlash kutilayotganini aytgan. Mutaxassisning ta’kidlashicha, bu ishlarni metropolitenning amaldagi ish vaqti (soat 00:00 dan 5:00 gacha) doirasida ham amalga oshirish mumkin, ammo bunga ko‘proq vaqt ketadi.
Metropoliten vakili yo‘nalishlar endi doim qisqartirilgan vaqt bo‘yicha ishlashi borasidagi yo‘lovchilarning xavotirlariga chek qo‘yib, bu ikki yo‘nalish metropolitenning “yuragi” ekanligini va barcha yo‘lovchi tashuvlarining, taxminan, 70 foizi to‘g‘ri kelishini ta’kidlagan.
“Biz hatto ‘Yunusobod’ va yerusti halqa metro yo‘nalishlarini ham, agar bunga ehtiyoj bo‘lsa, yangi o‘quv yiligacha soat 5:00 dan 00:00 gacha o‘tkazish masalasini ko‘rib chiqyapmiz”, — deb qo‘shimcha qilgan Sulton Qodirov.
Ta’kidlash joizki, so‘nggi paytlarda ijtimoiy tarmoqlarda Toshkent metropoliteni bilan bog‘liq kamchiliklar haqida ko‘p marotaba yozib kelinmoqda. Xususan, 18-may kuni Sergeli metrosidagi bekatlardan biri 14 daqiqaga elektr ta’minotidan uzilib qoldi. 13-may kuni “Amir Temur xiyoboni” bekatida barcha yo‘lovchilar tushirib yuborilgandi, 7-may kuni soat 21:10 dan 22:00 gacha Toshkent metropoliteni Halqa yo‘lining 7-bekatida elektr energiyasi o‘chib qolgandi.
9-aprel kuni ijtimoiy tarmoqlarda poyezdning ochiq eshiklar bilan harakati tushirilgan video tarqaldi. Shu bilan birga, metropolitendagi yerosti va yerusti poyezd harakatlarining bir nechta boshqa videolari ham ijtimoiy tarmoqlarda ko‘p bora muhokama qilindi. 28-aprel kuni esa poyezd tunnelda to‘xtab qolgani, yo‘lovchilar relslar orqali harakatlanib, bekatga yetib olgani tasvirlangan video tarqaldi.
18-mart kuni esa “Olmazor” (Chilonzor yo‘li) va “Bekat-1” (Sergeli yo‘li) orasidagi tunnelda ikki poyezd to‘qnashgandi.
