Олий Мажлис Қонунчилик палатаси депутатлари 18 май куни бўлиб ўтган йиғилишда «Ўзбекистон Республикасининг Солиқ кодексига ўзгартиш ва қўшимчалар киритиш тўғрисида»ги қонун лойиҳасини биринчи ўқишда қабул қилди, деб хабар берди парламент қуйи палатаси матбуот хизмати.
Қонун лойиҳасида электр двигателлари бўлган автотранспорт воситаларини сотиб олиш ва (ёки) Ўзбекистон ҳудудига вақтинча олиб кириш учун тўловларни тўлашдан озод қилиш кўзда тутилган.
Ҳозирда автомобилларни сотиб олиш ва (ёки) Ўзбекистонга вақтинча олиб кириш учун йиғимлар автомобиль эгалари томонидан Ички ишлар вазирлигида рўйхатдан ўтказилганда тўланади. Янги ишлаб чиқарилган автомобиллар учун тўлов сотиб олиш нархининг 3 фоизини ташкил этади.
Давлат статистика қўмитаси маълумотларига кўра, 2020 йилда Ўзбекистонга қиймати 2,9 миллион доллар бўлган 131 та электромобиль импорт қилинган. 2021 йилнинг уч ойи давомида 91 та электромобиль мамлакатга олиб келинган.
Шу билан бирга, Ўзбекистон электромобиллар ишлаб чиқаришни ўзлаштирмоқчи. «Ўзавтосаноат» март ойида 2025 йилга қадар бундай транспорт воситаларини ишлаб чиқаришни режалаштираётганини эълон қилди. Апрель ойида «Фарғона» кичик саноат зонасида электр транспорт воситаларини йиғиш ва ишлаб чиқаришни бошлаш 2021 йил ноябрда кутилаётгани ҳақида хабар берилган эди. Ишлаб чиқариш қуввати йилига 30 мингтани ташкил этади.
Бундан ташқари, 14 май куни бўлиб ўтган МДҲ саноат сиёсати кенгашининг навбатдаги йиғилишида Ўзбекистон МДҲда электр транспорт воситалари ишлаб чиқаришни ривожлантиришда ҳамкорлик қилишга тайёр эканлиги айтилди.
Изоҳ (0)