Oliy Majlis Qonunchilik palatasi deputatlari 18-may kuni bo‘lib o‘tgan yig‘ilishda “O‘zbekiston Respublikasining Soliq kodeksiga o‘zgartish va qo‘shimchalar kiritish to‘g‘risida”gi qonun loyihasini birinchi o‘qishda qabul qildi, deb xabar berdi parlament quyi palatasi matbuot xizmati.
Qonun loyihasida elektr dvigatellari bo‘lgan avtotransport vositalarini sotib olish va (yoki) O‘zbekiston hududiga vaqtincha olib kirish uchun to‘lovlarni to‘lashdan ozod qilish ko‘zda tutilgan.
Hozirda avtomobillarni sotib olish va (yoki) O‘zbekistonga vaqtincha olib kirish uchun yig‘imlar avtomobil egalari tomonidan Ichki ishlar vazirligida ro‘yxatdan o‘tkazilganda to‘lanadi. Yangi ishlab chiqarilgan avtomobillar uchun to‘lov sotib olish narxining 3 foizini tashkil etadi.
Davlat statistika qo‘mitasi ma’lumotlariga ko‘ra, 2020-yilda O‘zbekistonga qiymati 2,9 million dollar bo‘lgan 131 ta elektromobil import qilingan. 2021-yilning uch oyi davomida 91 ta elektromobil mamlakatga olib kelingan.
Shu bilan birga, O‘zbekiston elektromobillar ishlab chiqarishni o‘zlashtirmoqchi. “O‘zavtosanoat” mart oyida 2025-yilga qadar bunday transport vositalarini ishlab chiqarishni rejalashtirayotganini e’lon qildi. Aprel oyida “Farg‘ona” kichik sanoat zonasida elektr transport vositalarini yig‘ish va ishlab chiqarishni boshlash 2021-yil noyabrda kutilayotgani haqida xabar berilgan edi. Ishlab chiqarish quvvati yiliga 30 mingtani tashkil etadi.
Bundan tashqari, 14-may kuni bo‘lib o‘tgan MDH sanoat siyosati kengashining navbatdagi yig‘ilishida O‘zbekiston MDHda elektr transport vositalari ishlab chiqarishni rivojlantirishda hamkorlik qilishga tayyor ekanligi aytildi.
Izoh (0)