Фаластиннинг ҲАМАС ташкилоти ўт ўчишни тўхтатиб, Исроил билан сулҳ тузиши ҳақидаги ОАВлар тарқатган хабарлар — ёлғон эканини маълум қилди. Бу ҳақда ҲАМАС сиёсий бюроси аъзоси Иззат ар-Ришек ўз Twitter’ида маълум қилди, деб ёзади «РБК».

Фото: Reuters

«Баъзи душман ОАВнинг ҲАМАС ўт очишни тўхтатишга рози бўлгани ҳақидаги хабарлари — ҳақиқат эмас. Ҳеч қандай келишувга эришилгани ёки ўт очишни тўхтатишнинг муайян муддатлари белгилангани йўқ», — деб ёзди ар-Ришек.

ҲАМАС ўт очишни тўхтатмоқчи экани ҳақида 12 май куни Исроилнинг The Times of Israel газетаси ёзганди. Мақола муаллифларининг қайд этишича, тегишли баёнот ташкилот сиёсий идораси раиси ўринбосари Мусо Абу Марзук томонидан Россия ташқи ишлар вазири ўринбосари Михаил Богданов билан суҳбат чоғида берилган. Мақолага эса қуйидагича сарлавҳа қўйилган эди — «ҲАМАС вакили Россияга маълум қилди: биз Исроилга нисбатан ўт очишни тўхтатишга тайёрмиз».

Фаластин—Исроил низосининг 2014 йилдан буён кузатилган энг кучли авж олиши май ойида Исроил ҳукуматининг Қуддусда бир қатор араб оилаларини кўчириб юбориш қароридан кейин бошланди. Бу норозиликларни келтириб чиқарди ҳамда Қуддусда араб намойишчилар ва Исроил полицияси ўртасидаги тўқнашувларга сабаб бўлди.

Вазиятга ҲАМАС аралашди. Исроил унинг полицияни олиб кетиш ҳақидаги талабларини бажармаганидан кейин гуруҳ ракеталар отишни бошлади. Бунга жавобан Исроил Ғазо секторини ўққа тутди.

17 май ҳолатига, Исроил томонидан ўн киши, Фаластин томонидан — 200 дан ортиқ одам ҳалок бўлган.

15 май куни ҲАМАС Исроил ҳукумати араб аҳолисини ўз уйларидан кўчириб юбориш ҳақидаги қарорини бекор қилиб, қўлга олинган намойишчиларни озод этсагина, ўт очишни тўхтатишини маълум қилди.