Шавкат Мирзиёев 1 июлдан бошлаб сурункали касалликларни бирламчи бўғинда даволаш бўйича янги тизим жорий этилишини маълум қилди

Бугунги кунда Ўзбекистонда 250 дан зиёд касалликларнинг 87 тасини бирламчи бўғинда даволаш учун барча имкониятлар мавжуд. Бу ҳақда Президент Шавкат Мирзиёев раислигида ўтказилган йиғилишда қайд этилди, дея хабар бермоқда «Дарё» мухбири.

«Бугунги кунда 250 дан зиёд касалликларнинг 87 тасини – юқори қон босими, ошқозон-ичак, нафас йўллари сурункали касалликлари, камқонлик каби касалликларни бирламчи бўғинда даволаш, бунинг учун 20 турдаги лаборатория ва диагностика текширувларини ўтказиш учун барча имкониятлар мавжуд. Бунинг учун бирламчи бўғинни малакали кадрлар билан ҳамда шошилинч ёрдам учун зарур 50 турдаги дори ва 16 турдаги тиббиёт воситалари билан таъминлаш керак бўлади.

Шу боис жорий йил 1 июлдан бошлаб, сурункали касалликларни бирламчи бўғинда даволаш бўйича янги тизим жорий этилади. Бунда, биринчи босқичда Сирдарё вилоятида оилавий шифокор пункти ва поликлиникалар орқали эрта ўлимнинг асосий сабаби бўлган юрак ва қон-томир касалликларини даволаш учун аҳоли дори воситалари билан бепул таъминланади.

Йил якунига қадар Сирдарёда ушбу касалликларни 10 фоизга камайтиришга эришганда ҳам, биргина шошилинч ёрдам учун сарфланаётган 500 миллион сўм бюджет маблағлари тежалади. Ушбу тежалган маблағларни келгусида сурункали нафас ва ошқозон-ичак касалликларини бирламчи бўғинда даволашга йўналтириш имкони пайдо бўлади», – деди давлат раҳбари.

Президент Соғлиқни сақлаш вазири биринчи ўринбосари Амрилло Иноятовга бир ой муддатда бирламчи бўғиндаги юрак қон-томир касалликларини даволаш бўйича протоколларни тасдиқлаб, амалиётга жорий этиши лозимлигини таъкидлади.

Бундан аввал Шавкат Мирзиёев тиббиёт тизимида 5 та йўналишда жиддий ўзгаришлар қилинишини айтгани, Андижон, Хоразм ва Тошкент вилоятлари аҳолиси тиббиётдаги ишлар аҳволидан норози экани ҳамда Шавкат Мирзиёев 20 та туманнинг тиббиёт бирлашмалари фаолияти танқид қилгани ҳақида хабар берилганди.