Туман ва шаҳар ҳокимлари қўшимча маблағ ажратиб, ўз ҳудудидаги оилавий шифокор пункти ва поликлиникаларда шароитни яхшиласа, малакали шифокорларни кўпайтирса, аҳолининг 70 фоиз муаммолари жойида ҳал бўлади. Бу ҳақда айни пайтда Президент Шавкат Мирзиёев раислигида ўтказилаётган йиғилишда давлат раҳбари гапирди, дея хабар бермоқда «Дарё» мухбири.
«Соғлиқни сақлаш вазири биринчи ўринбосари Амрилло Иноятов туман ва шаҳар ҳокимлари билан бирга, оилавий шифокор пункти ва поликлиникаларда хизматлар сифатига, уларни жиҳозлашга ҳамда бирламчи бўғин тиббиёт ходимларининг билим ва малакасини оширишга шахсан масъул бўлади.
Туман ва шаҳар ҳокимлари бир нарсани аниқ тушуниб олишлари зарур. Агар улар қўшимча маблағ ажратиб, ўз ҳудудидаги оилавий шифокор пункти ва поликлиникаларда шароитни яхшиласа, малакали шифокорларни кўпайтирса, аҳолининг 70 фоиз муаммолари жойида ҳал бўлади.
Мисол учун, Китоб туманида хатлов натижасига кўра, бир ой ичида учинчи ва тўртинчи гуруҳга мансуб (сурункали касаллиги бўлган) 20 турдан ортиқ касалликлар бўйича 1,5 минг нафар беморларга жойида керакли ёрдам кўрсатилгани боис вилоят ва республика шифохоналарига мурожаат 2 бараварга камайган. Кармана ва Боёвут туманлари, Каттақўрғон ва Чирчиқ шаҳарларида ҳам аҳоли билан маҳаллабай тизимда ишлаш ўз самарасини бермоқда.
Аксинча, 20 та туманда тиббиёт бирлашмаларининг ишлари етарли даражада ташкил этилмаган. Булар – Қоровулбозор, Чироқчи, Қамаши, Қўнғирот, Чимбой, Марҳамат, Жалақудуқ, Зарбдор, Мингбулоқ, Поп, Оқдарё, Сайхунобод, Ангор, Пскент, Юқори Чирчиқ, Ёзёвон, Учкўприк, Янгиариқ, Хива, Сергели туманлари. Нега бу туманларда ўзгаришлар сезилмаяпти, нега бу туманларнинг тиббиёт бирлашмаси раҳбарлари ёш, малакали кадрлар эмас?», – деди Шавкат Мирзиёев.
Бундан аввал Шавкат Мирзиёев тиббиёт тизимида 5 та йўналишда жиддий ўзгаришлар қилинишини ҳамда Андижон, Хоразм ва Тошкент вилоятлари аҳолиси тиббиётдаги ишлар аҳволидан норози эканини айтгани ҳақида хабар берилганди.
Изоҳ (0)