Фтизиатрия ва Педиатрия марказлари Ўзбекистоннинг ҳамма ҳудудида ўз филиалларини ташкил этгани туфайли Тошкент шаҳрига келувчи беморлар сони сўнгги 2 йилда қарийб 20 фоизга камайган. Бу ҳақда Президент Шавкат Мирзиёев раислигида ўтказилган йиғилишда маълум қилинди, дея хабар бермоқда «Дарё» мухбири.
«Соғлиқни сақлаш вазири ўринбосари Улуғбек Собиров ихтисослашган марказларини ислоҳ қилиши, уларни туманбай ва маҳаллабай ишлашга ўргатиши зарур.
Мисол учун, Фтизиатрия ва Педиатрия марказлари барча ҳудудларда ўз филиалларини ташкил этгани боис пойтахтга келувчи беморлар сони сўнгги 2 йилда қарийб 20 фоизга камайган. Шу билан бирга, Нейрохирургия марказига бошқа ҳудудлардан мурожаатлар камайган бўлса-да, филиал ташкил этилмаган Хоразм вилоятидан қатнов 60 фоизга ортган.
Шу боис Собиров ихтисослашган марказлар билан вилоят, туман ва шаҳар тиббиёт муассасаларини бир-бирига боғлаш бўйича мутлақо янги тизимни яратиши зарур.
Мисол учун, жарроҳлик амалиётини талаб этмайдиган юрак қон-томир, ошқозон-ичак, нафас йўллари, тери касалликларига диагноз қўйиш, даволаш ва реабилитация жараёнларини туманларда амалга ошириш мумкин», – деди Президент.
Давлат раҳбарининг таъкидлашича, кўз микрохирургияси, юрак қон-томирда стентлаш, урология, травматология, кўкрак ва қорин бўшлиғи йўналишларидаги жарроҳлик муолажаларини вилоят даражасида ташкил қилиш учун барча шароитлар етарли.
«Бунинг учун Травматология маркази – Қорақалпоғистон, Сурхондарё ва Тошкент вилоятида протезлаш;
Хирургия ва Шошилинч марказлар – Самарқанд, Наманган ва Хоразмда буйрак трансплантацияси;
Кардиология маркази – Андижон, Навоий ва Қашқадарёда юрак қон-томирда стентлаш ва болалар юрак жарроҳлиги;
Урология маркази – Қорақалпоғистон, Жиззах ва Фарғонада буйракдан тош олиш муолажаларини йўлга қўйилиши шарт.
Республика марказларида эса, фақат мураккаб ташхисли касалликлар ва юқори технологик амалиётлар бажарилиши устувор бўлиши керак», – деди Шавкат Мирзиёев.
Бундан аввал Шавкат Мирзиёев 1 июлдан бошлаб сурункали касалликларни бирламчи бўғинда даволаш бўйича янги тизим жорий этилишини маълум қилгани, Шавкат Мирзиёев олис ҳудудларга шифокорларни жалб қилиш ишлари суст олиб борилаётганини кескин танқид қилгани ҳамда барча тиббиёт муассасаларида электрон тизим билан ишлайдиган 2 мингта ИТ-оператор–ҳамшира лавозими жорий этилиши ҳақида хабар берилган эди.
Изоҳ (0)