Наманганда 2021 йил апрель ойи охирида вилоятларда илк бор буйрак кўчириб ўтказиш амалиётлари ўтказилди. Бу ҳақда «Дарё» мухбири Азизбек Абдувалиев хабар бермоқда.
Бунга қадар буйрак трансплантацияси операцияси фақат Тошкентда, Республика шоишилинч тиббий ёрдам илмий маркази ва В. Воҳидов номидаги республика ихтисослаштирилган жарроҳлик илмий-амалий тиббиёт марказида амалга ошириларди.
Дастлабки операция қарийб уч соат давом этди. Чортоқ туманида яшовчи Ёқутхон Муталиева 21 ёшли қизи Дилноза Аҳмаджоновага буйрагини берди.
Операция столига ётқизилган яна бир бемор поплик 30 ёшли темир йўл ишчиси Муҳриддин Маҳкамов бўлди. Унга акаси Муроджон Маҳкамов донорлик қилди.
Янгиқўрғон туманининг Ғовазон қишлоғида яшовчи Жавоҳир Эргашевнинг жонига эса турмуш ўртоғи Наима Қаюмова оро кирди. У эрининг қуриган буйраги ўрнига ўзиники кўчириб ўтказилишига эришди.
«Юрагимни сўрашганда ҳам берган бўлардим. Чунки бу билан ўзим севган инсоннинг ҳаётини сақлаб қолаяпман, аёллик бурчимни бажаряпман. Агар шундай қилмаганимда бир умр виждоним қийналиб ўтган бўларди», — дейди Наима.
Жавоҳир ва Наима 24 ёшда. Бири уста, иккинчиси гўзаллик салони ходимаси. Мактабда ва коллежда бирга таҳсил олишган. 7 йил давомида севишиб, бир-бирларини синаб, бундан уч йил аввал турмуш қуришган. Хушнудбек исмли 2 яшар ўғиллари бор.
Жавоҳир бундан 1,5 йил аввал ўзида касаллик аломатларини пайқаган. Текширувлар давомида унинг икки буйраги ҳам қуригани маълум бўлган. Шундан сўнг гемодиализ аппаратига уланган ҳолда кун кўришга мажбур бўлган.
«Тушкунликка тушиб қолдим, кечалари билан йиғлаб чиқардим. Ёшман, яшагим келади. Яқинларим, турмуш ўртоғим, энди тетапоя бўлаётган боламга кўзим қиймайди. Акаларим буйрагини бермоқчи бўлди, лекин уларники мос келмади», — дея ҳикоя қилади Жавоҳир.
Наиманинг айтишича, эрига айнан у донор бўлиши мумкинлигини бошидан кўнгли сезган ва шифокорларга мурожаат қилган.
«Бизни қайта-қайта текширишди, ‘қариндош бўласизларми’ деб ҳайратланишди. Чунки буйрагимиз, қонимиз 100 фоиз тўғри келибди, ҳеч қандай моне’лик йўқ экан. Мени бундан қайтармоқчи бўлган, ‘қўй, ўзинг яримжон бўлиб қоласан’ деб насиҳат қилганлар кўп бўлди. Лекин шаштимдан қайтмадим, Аллоҳга таваккал қилдим», — дейди Наима Қаюмова.
Наима турмуш ўртоғи узоқ вақтлардан бери энди тинч ухлаётгани, дард ва оғриқлари чекинганини айтмоқда. Буйрак янги танага мослашиб кетиши учун эса яна бироз муддат талаб этилишини таъкидлайди.
Асосийси, ёш оила келажакка умид билан қарамоқда. Уларнинг ўғиллари Хушнудбекнинг бўлажак касби борасидаги ниятлари ҳам аллақачон дилга тугилган: у, албатта, нефролог — буйракларни даволашга ихтисослашган шифокор бўлади.
Изоҳ (0)