Сиёсатчи Алексей Навальнийнинг маслакдоши Леонид Волковнинг айтишича, Навальний жамоаси кўча митингларининг аввалги форматидан воз кечади. Энди намойишчилар бўлажак митинглар тўғрисида олдиндан огоҳлантирилмайди. Бу ҳақда Волков Чикаго университети томонидан ташкил этилган веб-семинардаги нутқида айтиб ўтди, деб ёзади Meduza.
«Кўча норозиликлари ортиқ 2021 йил январь ойидаги кўринишда бўлмайди. Аммо бу катта муаммо эмас, шунингдек, энди умуман норозиликлар бўлмайди дегани ҳам эмас. Кейинги норозилик оммавий тайёргарликсиз кечади, биз норозилик акциясини маълум бир кунга режалаштираётганимиз, уни тайёрлаётганимиз ҳақида олдиндан эълон қилмаймиз, бу ҳақда материаллар тарқатмаймиз. Путиннинг сўнгги ҳаракатлари шунга мажбур қилди. Бироқ бу норозилик ўз-ўзидан аланга олишини англатади. Бу яхшими? Йўқ. Бу муқаррарми? Ҳа», — деди Волков.
Волковнинг фикрига кўра, 2021 йилдаги норозилик намойишларидан сўнг Россия ҳукумати «репрессия даражасини оширишга ва намойишчиларга нисбатан бундан ҳам кўпроқ зўравонлик ишлатишга тайёр эканлигига шубҳа қолдирмади. Унинг таъкидлашича, намойишчилар маъмурий ҳибсга олиниш, катта миқдорда жаримага тортилиш, шунингдек, ишдан бўшатилиш ёки университетлардан ҳайдалиш сингари жазоларга дуч келмоқда.
Январь ойида Германиядан қайтиб келганидан кейин ҳибсга олинган ва колонияга юборилган Алексей Навальнийни қўллаб-қувватлаш учун Россияда 2021 йил бошидан бери бир неча йирик норозилик намойишлари бўлиб ўтди. 21 апрелда ўтказилган сўнгги акция мамлакат бўйлаб 100 мингдан ортиқ иштирокчиларни йиғди. «ОВД-Инфо» маълумотларига кўра, 21 апрель намойишларига боғлиқ ҳолда тахминан 2000 киши ҳибсга олинган, уларнинг баъзилари акциядан кейинги кунларда қўлга олинган.
Апрель ойида Москва прокуратураси Алексей Навальнийга алоқадор ташкилотлар: Коррупцияга қарши кураш фонди, Фуқароларнинг ҳуқуқларини ҳимоя қилиш жамғармаси, шунингдек, сиёсатчининг штаб-квартирасини экстремистик ташкилотлар, дея тан олинишини сўраб, Москва шаҳар судига мурожаат қилди.
Изоҳ (0)