Таиланд ҳукумати Камбоджани кеча, 28 июль куни эълон қилинган тинчлик сулҳига қарамай, қуролли тўқнашувларни давом эттиришда айблади. Бу ҳолат келишувдан атиги бир неча соат ўтиб юз берди. Бу ҳақда The Guardian хабар берди.
Таиланд қироллик армияси вакили, генерал майор Винтхай Сувареенинг маълум қилишича, Камбоджа кечаси бир нечта ҳудудларда Таиландга ҳужум қилган. Унга кўра, бу ҳаракатлар келишувга “қасддан путур етказиш ва ўзаро ишончни бузишга уриниш” сифатида баҳоланган.
“Биз сулҳ эълон қилинганидан сўнг ҳаракатларни тўхтатдик. Бироқ Камбоджанинг ҳужумларига жавоб қайтаришга тўғри келди. Таиланд ҳеч қандай босқинчилик қилмади, фақат халқаро меъёрларга кўра ҳудудий дахлсизликни ҳимоя қилди”, деди Суварее.
Камбоджа бош вазири Хун Манет эса бугун, 29 июль куни Facebookъда жойлаган постида “соат 00:00 дан кейин фронт чизиғида вазият юмшаганини” таъкидлаган. AFP мухбирининг хабар беришича, чегарадан 20 км узоқликдаги Самронг шаҳрида соат 23:30 дан бошлаб портлашлар тўхтаган ва тонггача тинчлик сақланган.
Сулҳга риоя қилиниши кераклиги борасида БМТ бош котиби Антониу Гутерриш ҳам чиқиш қилиб, томонларни келишувни тўлиқ бажаришга ва узоқ муддатли тинчликка йўл очишга чақирган. Шунга қарамай, Таиланд расмийлари чегарага яқин ҳудудлардаги фуқароларга ҳали уйларига қайтмасликни тавсия қилди. Айримлар ушбу тинчлик ташаббусига умид билан қараётган бўлса, бошқалар ҳали эҳтиёткорона ёндашмоқда. Чегара бўйича қўшма қўмита навбатдаги учрашувни 4 август куни Камбоджада ўтказиши кутилмоқда.
Маълумот учун, 28 июль куни Малайзияда ўтган тинчлик музокараларида икки томон “шартсиз ва зудлик билан” ўт очишни тўхтатишга келишганди. Сўнгги зиддиятлар охирги ўн йилликдаги энг йирик тўқнашувлардан бири бўлиб, ҳозиргача 38 киши ҳалок бўлиб, 300 мингдан ортиқ одам эвакуация қилинган.
Изоҳ (0)