Буюк Британияда рўйхатдан ўтган Туркманистоннинг Greatcom Trade LLP компанияси 2016 йил ноябрь ойида чет элдан озиқ-овқат маҳсулотларини сотиб олиш учун 25,7 миллион долларлик ҳукумат шартномасини қўлга киритди. Маълум бўлишича, фирма Туркманистон президентининг жияни Ҳожимурод Режеповга тегишли бўлиб, пул олганидан кўп ўтмай у ўзи учун уч қаватли уй қурдирган. Бу ҳақда «Гундогар» ва Turkmen News веб-сайти журналистларига таяниб, «Хроника Туркменистана» хабар берди.
Давлатдан ажратилган маблағ эвазига пудратчи Туркманистонга 15 100 тонна шакар, 7000 тонна товуқ гўшти, 2083 тонна кунгабоқар ёғи, 170 тонна сариёғ ва 107 тонна маргарин сотиб олиб, Туркманистонга етказиб бериши керак эди.
Журналистларнинг хабарига кўра, озиқ-овқат маҳсулотларини етказиб бериш бўйича 7,8 миллион долларлик яна бир шартнома Режеповнинг узоқ йиллик бизнес шериги Мардон Қурбоновга тегишли Staunchest Holdings LP компаниясига берилган.
2020 йил сентябрь ойида Туркманистон Савдо вазирлиги Шотландияда рўйхатдан ўтган Intergold LP компаниясига 1,6 миллион доллар юборгани ҳам маълум бўлди. Пул ўтказмасининг мақсади сифатида «ширинликлар» сотиб олиш кўрсатилган. Шу билан бирга, хабарда битимнинг умумий суммаси 3,5 миллион долларни ташкил этгани айтилмоқда.
2017 йилда Режепов собиқ Гажа хусусий қурилиш майдони ўрнида қурилган уч қаватли ҳашаматли уйлардан бирига эга бўлди. Журналистлар уйнинг интерьер дизайнери томонидан YouTube’га жойланган видеони томоша қилиб, шундай хулосага келди. Айни пайтда видео ўчириб юборилган.
Суриштирув аъзолари уйнинг бой безаклари орасида болалар хонасида уй эгасининг ўғлига тегишли каравотга ёзилган Б.Ҳ. бош ҳарфларини учратди. Бу Режеповнинг ўғли Бегенч Ҳожимуродовга тегишли, дея тахмин қилинмоқда. «Унинг фамилияси Туркманистонда одатий бўлгани каби отасининг исмидан олинган. Бегенч ҳаттоки уйнинг фотосуратини Instagram’га жойлаштирган», — дейилади хабарда.
Изоҳ (0)