Исроил Мисрнинг Ғазо секторида гуманитар сулҳ ҳақидаги таклифини рад этди. Бу ҳақда Al Arabiya канали ўз манбаларига таяниб хабар берди, деб ёзади «РБК».
Унинг маълумотларига кўра, Тель-Авивдаги музокараларда Миср делегацияси Исроилга бир йил муддатга ўт очишни тўхтатиш ҳақидаги битимни таклиф қилган, айни вақтда Қоҳира ушбу жараённи мувофиқлаштириш мажбуриятини ўз зиммасига олган. Ташриф чоғида Миср томони фаластинликларни ярашувга содиқ бўлиб қолдира олишини таъкидлаган.
Аммо Қоҳирада маълум қилишларича, Исроил таклифни рад этган. Бунга жавобан, телеканал манбаларига қараганда, Миср бир қатор йўналишлар бўйича Исроил томони билан ҳамкорликни тўхтатиб қўймоқчи.
Миср кўпинча Исроил ҳамда Ғазо секторини назорат қилувчи HAMAS ҳаракати (бир қатор мамлакатларда, шу жумладан, АҚШ ва Евроиттифоқда террористик ташкилот деб тан олинган) ўртасида воситачилик қилади. Қоҳира вакиллари дастлаб HAMAS етакчилари билан учрашди, сўнг Тель-Авивда исроилликлар билан музокаралар ўтказди, дея маълум қилган агентликка Миср разведкасидаги аноним манбалари.
«ТАСС» ўз манбасига таяниб хабар қилишича, мисрликлар доимий ярашувга эришиш учун биринчи босқич сифатида вақтинчалик ўт очишни тўхтатишни таклиф қилган, аммо ташаббус қўллаб-қувватланмаган ва делегация Тель-Авивни тарк этган.
13 май куни кечқурун Исроил армияси унинг ҳаво ва ер усти бўлинмалари Ғазо секторида ҳужум бошлаганини маълум қилди, унга жанговар самолётлар, вертолётлар, шунингдек, танклар ва артиллерия жалб қилинди. Ер устидаги операция ҳақида ҳозирча гап бормаяпти, деб ёзди Times of Israel ҳарбийларга таяниб. HAMAS’нинг «Иззеддинал-Қассам бригадалари» жанговар қаноти бунга жавобан Исроил шаҳарларига қарата 100 та янги ракета учирилганини эълон қилди.
Аввалроқ Исроил армияси вакили Хидаи Зилберман ҳарбийлар Ғазо секторида ер усти операцияси режаларини ишлаб чиқаётганини маълум қилганди. Channel 12 юқори мансабли дипломатик манбасига асосланиб, бу Исроил шиддатли ракета ҳужумига жавобан кўриб чиқаётган вариантлардан бири эканини маълум қилганди.
Исроил ва Фаластин ўртасидаги алоқалар Шарқий Қуддусда араб оилаларининг кўчириб юборилиши туфайли норозилик намойишлари ва тўқнашувлар фонида кескинлашди. 10 май куни вазиятга HAMAS жангарилари аралашди, Исроил мудофаа армияси жавоб ҳаракатларини амалга оширмоқда.
Изоҳ (0)