Сурхондарё вилояти Жиноят ишлари бўйича Олтинсой тумани судида маст ҳолда қўшнисини ҳақорат қилган тумандаги мактаблардан бирининг директор ўринбосарига жазо тайинланди, деб хабар беради ЎзА.
Маълум қилинишича, 23 март куни соат 18:00 ларда тумандаги мактабларнинг бирида директор ўринбосари бўлган С.В. исмли фуқаро спиртли ичимлик истеъмол қилиб, маст ҳолда жамиятда юриш-туриш қоидаларини қасддан менсимай, яшаш уйи олдидан ўтувчи кўчага яримяланғоч ҳолда чиқиб, жамоат тартибини ва ҳамқишлоқларининг хотиржамлигини бузган.
Шунингдек, у қўшниси Т.Қобиловни уятли сўзлар билан ҳақорат қилиб, баланд овозда шовқин кўтарган. Шу атрофда яшовчи фуқаролар ва йўлдан ўтиб кетаётганларнинг тинчлиги, осойишталигини бузиб, қўлига тош олиб, Т.Қобиловни қувлаб, қўшниси Л.Жабборованинг ҳовлисига яримяланғоч ҳолда кириб борган. У ерда ҳам баланд овозда шовқин кўтариб, уятли қилиқлар билан майда безориликлар содир этган.
Очиқ суд мажлисида ҳуқуқбузар – директор ўринбосари шу куни қўшниси Т.Қобиловнинг товуқлари томорқасига ўтгани учун у билан тортишиб қолгани, спиртли ичимлик истеъмол қилиб, маст ҳолатда бўлгани сабабли қўлига тош олиб, Т.Қобиловни қувлаганини тан олган. Маст бўлгани учун нималар қилганини яхши эслай олмаётгани, жабрланувчилардан кечирим сўраши, қилган ишидан пушаймонлигини, бошқа бундай ҳаракатлар содир этмаслигини айтиб, суддан қонуний енгиллик беришни сўраган.
Ҳуқуқбузарга Маъмурий жавобгарлик тўғрисидаги кодекснинг 183-моддаси билан 15 сутка маъмурий қамоқ жазоси тайинланиб, қамоқда сақланган ҳар бир куни учун давлат фойдасига базавий ҳисоблаш миқдорининг 15 фоизи миқдорида пул ундириш белгиланди.
Изоҳ (0)