Охирги уч йил ичида ҳудудий дастурлар доирасида 16 триллион сўмлик кредит ҳисобига амалга оширилган 4,2 мингта лойиҳанинг 50 фоиз пул тушумлари банкдан ташқари айланяпти. Бу ҳақда Президент Шавкат Мирзиёев раислигида 12 май, чоршанба куни ўтказилган йиғилишда давлат раҳбари қайд этди, дея хабар бермоқда «Дарё» мухбири.
Қашқадарё вилоятида 477 та лойиҳа, Сурхондарё вилоятида 463 та, Қорақолпоғистонд 424 та, Хоразм вилоятида 415 та, Наманганда 414 та, Андижонда 370 та, Фарғонада 356 та ҳудудий дастурлар доирасида кредит ҳисобига амалга оширилган минглаб лойиҳалар мавжуд.
Бу рақамлар ҳудуд ва тармоқлардаги лойиҳалар фақатгина кредит олиш мақсадида, «кўзбўямачилик» учун амалга ошириляпти, дегани эмас-ми?
Жойларда кредит ҳисобидан амалга оширилаётган лойиҳаларнинг аксариятида инфратузилмага улаш, технолог, маркетолог топишда ёрдам бериш, маҳсулот бозорини топиш орқали, уни сотишга кўмаклашиш йўлга қўйиш бўйича бирорта тармоқ, ҳудуд, сектор ва тижорат банклари раҳбарлари тизимли ишларни ташкил этмаяпти», — деди Президент.
Давлат раҳбари масъул вазирлик ва ташкилот раҳбарларига вилоят, туман ва шаҳар ҳокимлари, сектор ва тижорат банклари раҳбарлари билан бирга, икки ой муддатда ушбу корхоналар муаммоларини аниқлаб, уларни «соядан» чиқариш чораларини кўришни қатъий таъкидлади.
«Йўлдошев, Туробов, Бош прокуратура департаменти давлат дастурлари доирасида амалга оширилаётган лойиҳалар бўйича белгиланган параметрларнинг бажарилиши (рақамларни бўрттириб кўрсатиш кўплаб учрамоқда), кредитларнинг мақсадли ишлатилиши бўйича кунлик назорат ўрнацин ва айбдорларга нисбатан қатъий чоралар кўриш юзасидан ҳар ойда Президент Администрациясига ахборот киритиб борсин», — деди Шавкат Мирзиёев.
Изоҳ (0)