2021 йилнинг ярмигача Ўзбекистоннинг олтита ҳудудида умумий қиймати 220 миллион долларлик йирик тўқимачилик корхоналари ишга туширилади

Президент Шавкат Мирзиёев раислигида 12 май, чоршанба куни ўтказилган йиғилишда давлат раҳбари иккинчи чоракда 75 триллион сўмлик инвестицияларни амалга ошириш зарурлигини айтди, дея хабар бермоқда «Дарё» мухбири.

«Иккинчи чоракда 75 триллион сўмлик инвестицияларни амалга ошириш зарур. Шундан тўғридан-тўғри хорижий инвестиция ва кредитлар – 1,7 миллиард доллар, халқаро молия ташкилотлари маблағлари – 1,1 миллиард доллар, бюджет маблағлари – 8 триллион сўм, банк кредитлари – 13 триллион сўм.

Умурзоқов тармоқ ва ҳудуд раҳбарлари билан бирга, 1 июлга қадар ишга тушириш режалаштирилган 43 та йирик тармоқ ҳамда 2,5 мингта ҳудудий лойиҳалар бўйича ҳафталик назорат тизимини жорий этади.

Бунда «Ўзтўқимачиликсаноат» Андижон, Бухоро, Қашқадарё, Навоий, Тошкент вилоятлари ҳокимлари билан бирга, 1 июлгача Асака, Ғиждувон, Қарши, Хатирчи, Қибрай туманлари ва Чирчиқ шаҳрида умумий қиймати 220 миллион долларлик 6 та йирик тўқимачилик корхоналарини ишга тушириб, 2,5 минг нафар аҳолини доимий иш билан таъминлаш чораларини кўрсин», — деди давлат раҳбари.

Президент вилоят ҳокимлари муддатида ишга тушмаслик хавфи мавжуд бўлган 23 та йирик лойиҳа билан шахсан ўзлари шуғулланиши шартлигини таъкидлади.

«Бундай лойиҳалар Навоийда – 5 та, Бухоро ва Тошкент вилоятларида – 4 тадан, Андижон ва Наманганда – 3 тадан, Қорақалпоғистонда – 2 та, Сирдарё ва Фарғонада — 1 тадан.

Мазкур вилоят раҳбарлари 1 июлгача янги саноат корхоналари ташкил этиш суст бўлган 15 та туманда камида 10 тадан лойиҳани бошлаб, йил якунига қадар ишга туширади», — деди Шавкат Мирзиёев.

Давлат раҳбари биринчи ярим йилликда экспорт ҳажмини 5,2 миллиард долларга етказиш зарурлигини таъкидларкан, хусусан, шундай деди:

«Бунда январь—апрель ойларида қишлоқ хўжалиги маҳсулотлари экспорти бўйича бажарилмаган 169 миллион доллар ўрни иккинчи чоракда тўлиқ қопланиши керак. Жумладан, Фарғона – 50 миллион доллар, Андижон – 29 миллион доллар, Тошкент вилояти – 22 миллион доллар, Наманган – 17 миллион доллар, Самарқанд – 11 миллион доллар.

Шунингдек, «Ўзстандарт», «Ўзтўқимачиликсаноат» раҳбарлари май—июнь ойларида камида 10 та тўқимачилик корхонасида «Ойко Текс» стандартларини жорий этиб, йил якунига қадар 50 тага етказсин. Бундан ташқари, икки ой муддатда хорижий мутахассисларни жалб қилган ҳолда, «БиСиАй», «СиЕ», «Глобал гап» каби халқаро стандартлар бўйича ўқув дастурларини ишлаб чиқиб, маҳаллий корхоналар мутахассисларини жойларда ўқишини ташкил қилиш зарур».