Наманган шаҳрида Рамазон ҳайити арафасида мукаммал таъмирланган «Ўн бир Аҳмад» зиёратгоҳи фойдаланишга топширилди. Бу ҳақда «Дарё» мухбири Азизбек Абдувалиев хабар бермоқда.
Шаҳарнинг Давлатобод тумани, Юқори Ғирвон маҳалласида жойлашган мазкур қадамжо маҳаллий аҳоли томонидан энг кўп зиёрат қилинадиган масканлардан бири ҳисобланади.
Ушбу зиёратгоҳ ҳақида турли ривоятлар бор. Асосан, ислом оламининг турли ҳудудлари ва турли йилларда яшаб ўтган 11 нафар Аҳмад номи билан аталувчи азиз-авлиё ва шайхлар шарафига тикланган дея талқин қилинади.
Охирги йилларда зиёратгоҳнинг ҳолатига анча путур етган, бу ерга олиб борувчи йўл эса абгор ҳолатга келганди.
Шу боис 2018 йилда Наманган шаҳар ҳокимлиги томонидан «Ўн бир Аҳмад» зиёратгоҳида мукаммал таъмирлаш ишлари бошланганди. Аммо пандемия сабаб бу ташаббус кейинчалик бирмунча тўхтаб қолди. Ўтган йили куз ойларига келиб бунёдкорлик ишлари яна авж олди.
«Қарийб 1 гектар майдонни эгаллаган зиёратгоҳда мақбара, 110 метрли шарқон услубдаги айвон, учта шийпон, таҳоратхона, намозхона, жонлиқ сўйиш учун алоҳида жой ва ошхона барпо этилди. Рамзий дарвоза, фаввора, шаршара ва ҳовуз қурилди. Зиёратгоҳга олиб келувчи йўл равон кўринишга келтирилиб, 150 та машина учун мўлжалланган автотураргоҳ фойдаланишга топширилди», — дейди Наманган шаҳрида зиёратгоҳлар, муқаддас қадамжолар ва тарихий обидаларни сақлаш, ободонлаштириш ва бошқариш дирекцияси директори Ҳамидхон Қаҳҳаров.
Ҳамидхон Қаҳҳаровнинг айтишича, ҳозирги кунда вилоят ҳокими Шавкат Абдураззоқовнинг ташаббуси билан Наманган шаҳридаги «Мавлоно» зиёратгоҳида ҳам мукаммал таъмирлаш ишлари бошланиш арафасида.
Изоҳ (0)