“Mening fikrim” jamoaviy murojaatlari portalida shaharlarda transport vositalarining maksimal tezligini cheklash to‘g‘risida petitsiya e’lon qilindi, deb xabar beradi “Gazeta.uz”.
Murojaat muallifi yo‘l harakati qoidalariga o‘zgartirishlar kiritish orqali shaharlarda ruxsat etilgan maksimal tezlikni 50 kilometr/soat, ijtimoiy ahamiyatga ega obyektlar (maktablar, bolalar bog‘chalari, shifoxonalar va boshqalar) yaqinida 30 kilometr/soatgacha cheklashni taklif etgan.
Muallifning Jahon sog‘liqni saqlash tashkilotga tayanib yozishicha, avtomobil soatiga 30 kilometr tezlikda himoyasiz (himoyalanmagan) yo‘l ishtirokchisiga urilganda, ko‘p hollarda piyodalar omon qoladi, avtomobil tezligi 50 kilometr/soatda esa ularning aksariyati vafot etishi mumkin.
JSST piyodalar va transport vositalarining to‘qnashuvi natijasida o‘limga olib keladigan jarohatlarning oldini olish ehtimolini ko‘rsatadigan quyidagi ma’lumotlarni keltiradi:
- 60 km/soatda yuqori tezlikda o‘lim xavfi 95 foizni tashkil qiladi;
- 50 km/soat tezlikda o‘lim xavfi 80 foizgacha kamayadi;
- 40 km/soat tezlikda o‘lim xavfi 38−40 foiz bo‘lishi mumkin;
- 30 km/soat tezlikda o‘lim xavfi 10−13 foizgacha kamayadi.
“Shuni unutmangki, shaharda piyodalarga qaraganda transport vositalari ancha kam. Hamma piyodalar ham yosh va sog‘lom emas. Bundan tashqari, transport vositasidan chiqqanda haydovchilar ham piyodalarga aylanishadi va ularning hayoti boshqalar kabi tahdidlarga duchor bo‘ladi”, — deya ta’kidlaydi muallif.
Izoh (0)