АҚШ Қирғизистон ва Тожикистонга чегара можаросини ҳал қилишда исталган тарзда ёрдам беришни таклиф қилмоқда. Бу ҳақда 10 май, душанба куни АҚШ давлат котибининг Жанубий ва Марказий Осиё масалалари бўйича ёрдамчиси ўринбосари Жонатан Хеник айтиб ўтди, деб ёзади «ТАСС».
Вашингтондаги Атлантика кенгаши томонидан ўтказилган онлайн-семинарда Хеник Тожикистон ва Қирғизистон ўртасида воқеалар ривожидаги охирги ўзгаришлардан АҚШ руҳланганини таъкидлади.
«Бироқ биз вазият ўз ечимини топган, деб ўйлай олмаймиз. Муаммо ҳали бартараф қилинмаган. Аҳолининг уйларига қайтиши ва можаро зонасида қайта қуриш ишларини бошлашга шароит яратиш учун тинчлик ва барқарорлик керак бўлади», — деди АҚШ расмийси.
«Биз иккала мамлакат раҳбарлари билан Бишкек ва Душанбедаги элчихоналаримиз орқали тўғридан-тўғри алоқадамиз. Уларнинг Вашингтондаги элчихоналари билан ҳам боғландик. Биз низони тинч йўл билан ҳал қилишни ҳар қандай тарзда қўллаб-қувватлашимизни айтдик», — дея таъкидлади Хеник.
«Бундан ҳам муҳими Бишкек ва Душанбедаги раҳбариятларнинг масъулиятни ўз зиммасига олишга, бу каби ҳодиса такрорланмаслиги учун шароит яратиб беришга астойдил чақирдик», — деди АҚШ расмийси.
Аввалроқ Россия президенти Владимир Путин Қирғизистон ва Тожикистон ўртасидаги зиддиятли вазиятни ҳал қилишда воситачи сифатида иштирок этишга тайёрлигини айтганди.
Шунингдек, БМТ, Евроиттифоқ, Хитой, Ўзбекистон, Қозоғистон ҳам можарога ўз муносабатини билдириб, икки мамлакатни ўзаро низоларни тинчлик билан ҳал қилишга чақирган.
Қирғизистон ва Тожикистон чегарасидаги низо 28 апрель куни маҳаллий аҳоли ўртасидаги жанжал билан бошланган эди. У эса тожикистонлик ҳарбийлар баҳсли ҳудудда жойлашган «Головной» сув тақсимлаш пункти яқинидаги электр устунига видеокузатув камераларини ўрнатганидан кейин келиб чиққан. Қирғизистон чегара хизматининг ахбороти бўйича 29 апрелда икки давлат ҳарбийлари ўртасида отишма содир бўлган. Идора тожик томонининг миномёт ҳисоб-китоб позицияларини эгаллашни ташкиллаштираётганини қайд этган.
Изоҳ (0)