Ўзбекистондаги мактабларда она тили ва ўқиш фани дарс соатлари қисқартирилмаган ҳолда бирлаштирилиб, ягона дарслик жорий этилади. Бу ҳақда Халқ таълими вазирлиги ҳузуридаги Республика таълим маркази матбуот хизмати хабар берди.
Маълум қилинишича, шу пайтгача она тили ва ўқиш фанлари алоҳида ўқитилган. Энди эса ушбу икки фанни бирлаштирган она тили ва ўқиш саводхонлиги деб номланган ягона фан дарс соати сақлаб қолинган ҳолатда ташкил этилади.
Ўқиш фани, асосан, бадиий услубдаги, мавҳум тушунчаларни ташийдиган матнлардан иборат эди. Янги дарслик учун танланган матнлар ва шеърлар эса боланинг ижтимоий ҳаётга киришиб кета олишида кўмаклашадиган, ҳам бадиий, ҳам информатив, ҳам илмий-оммабоп услубдаги матнлардан иборат.
Амалдаги дарсликларда тинглаб тушуниш компетенсиясини ривожлантириш учун топшириқлар ажратилмаган бўлса, янгисида бу компетенсиясини ривожлантириш учун ҳар бир мавзуга алоҳида топшириқлар ишлаб чиқилган.
Ўқиб тушуниш компетенсиясини ривожлантириш учун ажратилган топшириқлар эса, асосан, матнда очиқ ифодаланган маълумотларга, ёки дидактик элементларга қаратилар эди. Энди эса дарсликда ўқиб тушуниш компетенсиясининг барча қисмларини қамраб оладиган савол ва топшириқлар бўлади.
«Шу пайтгача она тилини ўқитишдан мақсад тилнинг грамматикасини ўргатиш, тил структурасига оид қоидаларни ёд олдириш эди. Янги дарсликда энг муҳим қоидаларгина қолдирилган. Ранг-баранг тасвирлар ва қизиқарли топшириқларга кўпроқ урғу берилган», — дейилади хабарда.
Қайд этилишича, янги дарсликда уйга вазифалар мавжуд эмас. Нутқий мавзулар асосида изчилликда бир-бирини тўлдирадиган, ўзи изланиб топишга қаратилган ностандарт машқ ва топшириқлар ишлаб чиқилган.
Ўқитувчилар учун «Ўқитувчи китоби», ўқувчилар учун эса «Машқ дафтари» бўлади.
Аввалроқ янги ўқув йилидан бошлаб мактаб ўқитувчиларига янги адабиёт ва қўлланмаларни сотиб олиш учун бюджетдан 1 миллион сўмдан маблағ ажратилиши, чет тиллари бўйича юқори кўрсаткичларга эришган мактаблар учун Президент соврини таъсис этилиши ҳақида хабар берилган эди.
Изоҳ (0)