АҚШнинг Техас штати Шарқий округ судининг ҳакамлар ҳайъати эронлик Меҳрдод Ансорийни мамлакатга ҳарбий мақсадлар учун мўлжалланган қуролларнинг таркибий қисмларини олиб кириш ва олиб чиқишда иштирок этишда айбдор деб топди. Бу ҳақда АҚШ Адлия вазирлигининг сайтида маълум қилинди.
Маълумотларга кўра, Gulf Gate Sea Cargo транспорт компаниясининг таъсисчиси бўлган 39 ёшли Ансорий буюртмага кўра мамлакатдаги 63 та компаниядан сотиб олинган, фуқаролик мақсадларидан ташқари, ядровий қуролларда, ракеталарни бошқариш тизимларида, радиоэлектрон воситаларда фойдаланилиши мумкин бўлган бутловчи қисмларни шерикларига етказишда ёрдам берган.
Шу билан бирга, 2007 йилдан 2011 йилгача тахминан 2,6 миллион долларлик 105 мингдан ортиқ бутловчи қисмлар сотиб олинган. Жиноятчилар америкалик етказиб берувчиларга буюртма қилинган маҳсулотларни Эронга юбориш режалари тўғрисида маълум қилмаган ва ушбу компонентларни экспорт қилиш учун зарур лицензияни олмаган.
Ансорийга 1 сентябрь куни ҳукм ўқилади, унга Эрон билан савдо қоидаларини бузгани учун 20 йилгача, электрон фирибгарлик учун беш йилгача, АҚШ Молия вазирлигига нисбатан фирибгарликка уриниш учун беш йилгача ва ҳар бир ёлғон гувоҳлик учун беш йил озодликдан маҳрум этиш жазоси белгиланиши мумкин.
Аввалроқ АҚШ президенти Жо Байден администрацияси Эронга қарши жорий қилинган кескин санкцияларнинг маълум қисмини бекор қилиши мумкинлиги ҳақида хабар берилди. Давлат департаменти вакили Нед Прайс Эроннинг ядро келишуви шартларига қайтиши санкцияларнинг ечилишига асос бўлиши, бироқ Вашингтон айнан келишув шартларига алоқадор санкцияларни бекор қилмоқчи эканлигини айтиб ўтган.
«Биргаликдаги ҳаракатлар режаси» деб номланадиган келишув 2015 йил ёзида Теҳрон ҳамда бешта воситачи мамлакат ўртасида имзоланган. Кейинчалик Эроннинг мазкур келишувни қўпол равишда бузганликда айблашди. 2018 йил май ойи бошида АҚШ келишувдан бир томонлама чиқишини эълон қилди ва Эронга қарши санкциялар қайта жорий қилинганини билдирди. Эрон эса келишув шартларига ортиқ риоя қилмаслиги ва 2020 йил январдан мазкур шартномадан тўлиқ чиққанини қайд этди.
Изоҳ (0)