AQShning Texas shtati Sharqiy okrug sudining hakamlar hay’ati eronlik Mehrdod Ansoriyni mamlakatga harbiy maqsadlar uchun mo‘ljallangan qurollarning tarkibiy qismlarini olib kirish va olib chiqishda ishtirok etishda aybdor deb topdi. Bu haqda AQSh Adliya vazirligining saytida ma’lum qilindi.
Ma’lumotlarga ko‘ra, Gulf Gate Sea Cargo transport kompaniyasining ta’sischisi bo‘lgan 39 yoshli Ansoriy buyurtmaga ko‘ra mamlakatdagi 63 ta kompaniyadan sotib olingan, fuqarolik maqsadlaridan tashqari, yadroviy qurollarda, raketalarni boshqarish tizimlarida, radioelektron vositalarda foydalanilishi mumkin bo‘lgan butlovchi qismlarni sheriklariga yetkazishda yordam bergan.
Shu bilan birga, 2007-yildan 2011-yilgacha taxminan 2,6 million dollarlik 105 mingdan ortiq butlovchi qismlar sotib olingan. Jinoyatchilar amerikalik yetkazib beruvchilarga buyurtma qilingan mahsulotlarni Eronga yuborish rejalari to‘g‘risida ma’lum qilmagan va ushbu komponentlarni eksport qilish uchun zarur litsenziyani olmagan.
Ansoriyga 1-sentabr kuni hukm o‘qiladi, unga Eron bilan savdo qoidalarini buzgani uchun 20 yilgacha, elektron firibgarlik uchun besh yilgacha, AQSh Moliya vazirligiga nisbatan firibgarlikka urinish uchun besh yilgacha va har bir yolg‘on guvohlik uchun besh yil ozodlikdan mahrum etish jazosi belgilanishi mumkin.
Avvalroq AQSh prezidenti Jo Bayden administratsiyasi Eronga qarshi joriy qilingan keskin sanksiyalarning ma’lum qismini bekor qilishi mumkinligi haqida xabar berildi. Davlat departamenti vakili Ned Prays Eronning yadro kelishuvi shartlariga qaytishi sanksiyalarning yechilishiga asos bo‘lishi, biroq Vashington aynan kelishuv shartlariga aloqador sanksiyalarni bekor qilmoqchi ekanligini aytib o‘tgan.
“Birgalikdagi harakatlar rejasi” deb nomlanadigan kelishuv 2015-yil yozida Tehron hamda beshta vositachi mamlakat o‘rtasida imzolangan. Keyinchalik Eronning mazkur kelishuvni qo‘pol ravishda buzganlikda ayblashdi. 2018-yil may oyi boshida AQSh kelishuvdan bir tomonlama chiqishini e’lon qildi va Eronga qarshi sanksiyalar qayta joriy qilinganini bildirdi. Eron esa kelishuv shartlariga ortiq rioya qilmasligi va 2020-yil yanvardan mazkur shartnomadan to‘liq chiqqanini qayd etdi.
Mavzuga doir:
Izoh (0)