Мутлақ енгил вазн тоифасида ҳаракат қилувчи ўзбекистонлик UFC жангчиси Зарруҳ Адашевнинг (3-3) Райан Бенуага (10-7) қарши жанги бекор қилинди.
Адашевнинг рақиби вазн нормасини бажара олмаган, бундан ташқари спортчи вазн ўлчаш маросимида ўзини ёмон ҳис қилган ва ҳушини йўқотишига оз қолган. Бенуа вазн ҳайдаш вақтида ўзини анча қийнаб қўйгани тахмин қилинмоқда.
«Менинг Бенуага қарши жангим бекор қилинди. У вазн қила олмади. Аммо мен унга қарши ҳар қандай вазн тоифасида жанг қилишга тайёр эдим. Бироқ шифокорлар бунга рухсат бермади. Жангга жуда кучли тайёрлангандим ва жисмоний ҳолатим ҳам ўз чўққисида эди. Унга тезроқ тузалиб кетишни тилайман», — дея фикр билдирди Зарруҳ Адашев.
Эслатиб ўтамиз, Адашев — Бенуа жанги UFC Вегас 26 мусобақаси доирасида 9 май тонгида бўлиб ўтиши лозим эди.
Ўзбекистонлик яккакурашчи 20 январь куни бўлиб ўтган UFC кечасида хитойлик Су Мудаэржига (14-4) ютқазиб қўйди. Ундан аввал Адашев UFC’даги дебют жангини Тайсон Немга қарши ўтказган ва 32-сониядаёқ нокаутга учраганди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)