Ўзбекистондан Ҳиндистон ва Туркияга амалга ошириладиган авиақатновлар учун вақтинчалик чекловлар ўрнатилди

Республика махсус комиссияси қарори билан касалланиш кўрсаткичи юқори бўлган айрим давлатлар билан ўзаро авиақатновларга вақтинчалик чекловлар жорий этилди. Бу ҳақда Соғлиқни сақлаш вазирлиги матбуот хизмати хабар берди.

Хусусан:

• Истанбул шаҳридан Фарғона, Урганч ва Самарқанд шаҳарларига авиақатновларни 2021 йил 5 майдан 1 июнга қадар тўхтатиш;
• Ҳиндистон ва Туркияга сайёҳлар учун мўлжалланган барча чартер қатновларни 2021 йил 10 майдан бошлаб эпидемиологик вазият барқарорлашгунга қадар тўхтатиш;
• Тошкент—Истанбул йўналишида авиақатновларни вазиятдан келиб чиқиб, 2021 йил 10 майдан бошлаб паритет асосида (талабдан келиб чиқиб) камайтиришга қарор қилинди.

Шунингдек, маълум қилинишича, Ҳиндистон ва Туркиядан учиб келаётган ҳар бир шахс томонидан Ўзбекистонга кириб келганидан сўнг карантинда бўлишлари юзасидан огоҳлантирилгани юзасидан тилхат тўлдирилади. Бунда аэропортдан борадиган яшаш манзили, телефон рақами ва карантин талабларини бузганда қонунчилик ҳужжатларида жавобгарлик белгилангани тўғрисида огоҳлантирилади.

Бундан ташқари, касаллик кириб келиши қамровини аниқ баҳолаш мақсадида Санитария-эпидемиологик осойишталик ва жамоат саломатлиги хизмати таклифига мувофиқ, Ҳиндистон ёки Туркиядан Ўзбекистонга кириб келаётган барча шахслардан коронавирус инфекциясига Давлат бюджети маблағлари ҳисобидан ПЗР текширувини ўтказиш тизими синов тариқасида жорий этилади. Улардан коронавирус инфекциясига ПЗР-тест намунаси аэропорт кутиб олиш залида олинади ва белгиланган тартибда уй ёки меҳмонхонада 14 кун давомида карантинда бўлиш учун жўнатилади.

• ПЗР-тест таҳлили 18 соат ичида мусбат чиққан тақдирда белгиланган тартибда даволаш ишларини ташкиллаштиради;
• ПЗР-тест таҳлили натижаси манфий чиққан тақдирда шахс 14 кунлик карантинда бўлиши давом эттирилади.

Ўзбекистонга ҳаво йўллари орқали ташриф буюраётган шахслар сўнгги 72 соатдан кўп бўлмаган муддатда коронавирус инфекциясига фақат ПЗР орқали текширилиб, манфий кўрсаткичга эга деб топилган маълумотномани тақдим этиш талаби сақланиб қолади.