Франциялик балиқчилар Буюк Британиянинг Жерси оролини қамалдан чиқарди

Франциялик балиқчилар балиқ овлашга қўйилган чекловларга норозилик сифатида Нормандиянинг энг катта ороли ҳисобланган Жерсини қамал қилишни тўхтатди. Бу ҳақда Reuters хабар берди.

«Франциянинг балиқ овловчи қайиқлари Жерси ҳудудини тарк этганидан хурсандмиз.  Биз оролга ҳар қандай ёрдамни кўрсатишга шай ҳолатда турамиз», — деб таъкидлади Буюк Британия ҳукумати вакили.

Буюк Британия бош вазири Борис Жонсон мамлакатнинг иккита кемаси эҳтиёт чораси сифатида Жерсида қолдирилишини буюрди.

Жерси қироллик мулки бўлиб, у Буюк Британиянинг бир қисми саналмайди, лекин оролнинг мудофааси Лондон зиммасидаги вазифа ҳисобланади.

Аввалроқ Жерси ҳукумати Буюк Британия ва Европа Иттифоқининг Савдо-сотиқ ва ҳамкорлик тўғрисидаги битимига мувофиқ янги қоидаларни жорий этганди. Унга кўра, франциялик қайиқ эгалари ушбу ҳудудда аввал балиқ тутганини тасдиқлаганидан кейингина Жерси ҳукумати уларга лицензия бериши белгиланди.

Бунга жавобан янги тартибдан норози бўлган франциялик балиқчилар 50 га яқин қайиқларда Жерси атрофига тўпланди. Энг камида битта француз траулери (балиқ овлаш кемаси) асосий портга кириб, Нормандия оролларини Буюк Британия ҳудуди билан боғловчи юк кемаси ва паром — Commodore Goodwill’ни қисқа муддатга блоклаб қўйди. Бунинг натижасида Франция ва Буюк Британия ҳудудга ўзларининг патруль кемаларини юборди.

Нормандия Балиқчилик ҳудудий қўмитасининг матбуот котиби орол расмийлари ва балиқчилик вакиллари ўртасидаги музокаралар ижобий натижа бермаганини маълум қилди.

Шунингдек, Франция балиқ овлашнинг янги қоидалари туфайли оролни электр энергиясидан узиб қўйиш билан таҳдид қилди. Маълумот учун, Жерси электроэнергиянинг 95 фоизини сувости кабеллари орқали Франциядан олади.

Аввалроқ Франция Ла-Манш бўғозидаги Жерси оролини электрсиз қолдириш билан таҳдид қилгандан сўнг Англия оролга иккита патруль кемасини юбораётгани ҳақида хабар берилди. Британия ҳукумати бош вазири Борис Жонсон, орол бош вазири Жон Ле Фондре ҳамда Жерси ташқи ишлар вазири Ян Горст ўртасида музокаралар ўтказилди.

Музокаралар чоғида Жонсон Жерси ва Франция ўртасидаги «кескинликни юмшатиш зарурлигини» таъкидлаб, оролга «узлуксиз ёрдам» беришга ваъда берди. У ҳар қандай қамал бутунлай асоссиз бўлишини айтди.