Fransiyalik baliqchilar baliq ovlashga qo‘yilgan cheklovlarga norozilik sifatida Normandiyaning eng katta oroli hisoblangan Jersini qamal qilishni to‘xtatdi. Bu haqda Reuters xabar berdi.
“Fransiyaning baliq ovlovchi qayiqlari Jersi hududini tark etganidan xursandmiz. Biz orolga har qanday yordamni ko‘rsatishga shay holatda turamiz”, — deb ta’kidladi Buyuk Britaniya hukumati vakili.
Buyuk Britaniya bosh vaziri Boris Jonson mamlakatning ikkita kemasi ehtiyot chorasi sifatida Jersida qoldirilishini buyurdi.
Jersi qirollik mulki bo‘lib, u Buyuk Britaniyaning bir qismi sanalmaydi, lekin orolning mudofaasi London zimmasidagi vazifa hisoblanadi.
Avvalroq Jersi hukumati Buyuk Britaniya va Yevropa Ittifoqining Savdo-sotiq va hamkorlik to‘g‘risidagi bitimiga muvofiq yangi qoidalarni joriy etgandi. Unga ko‘ra, fransiyalik qayiq egalari ushbu hududda avval baliq tutganini tasdiqlaganidan keyingina Jersi hukumati ularga litsenziya berishi belgilandi.
Bunga javoban yangi tartibdan norozi bo‘lgan fransiyalik baliqchilar 50 ga yaqin qayiqlarda Jersi atrofiga to‘plandi. Eng kamida bitta fransuz trauleri (baliq ovlash kemasi) asosiy portga kirib, Normandiya orollarini Buyuk Britaniya hududi bilan bog‘lovchi yuk kemasi va parom — Commodore Goodwill’ni qisqa muddatga bloklab qo‘ydi. Buning natijasida Fransiya va Buyuk Britaniya hududga o‘zlarining patrul kemalarini yubordi.
Normandiya Baliqchilik hududiy qo‘mitasining matbuot kotibi orol rasmiylari va baliqchilik vakillari o‘rtasidagi muzokaralar ijobiy natija bermaganini ma’lum qildi.
Shuningdek, Fransiya baliq ovlashning yangi qoidalari tufayli orolni elektr energiyasidan uzib qo‘yish bilan tahdid qildi. Ma’lumot uchun, Jersi elektroenergiyaning 95 foizini suvosti kabellari orqali Fransiyadan oladi.
Avvalroq Fransiya La-Mansh bo‘g‘ozidagi Jersi orolini elektrsiz qoldirish bilan tahdid qilgandan so‘ng Angliya orolga ikkita patrul kemasini yuborayotgani haqida xabar berildi. Britaniya hukumati bosh vaziri Boris Jonson, orol bosh vaziri Jon Le Fondre hamda Jersi tashqi ishlar vaziri Yan Gorst o‘rtasida muzokaralar o‘tkazildi.
Muzokaralar chog‘ida Jonson Jersi va Fransiya o‘rtasidagi “keskinlikni yumshatish zarurligini” ta’kidlab, orolga “uzluksiz yordam” berishga va’da berdi. U har qanday qamal butunlay asossiz bo‘lishini aytdi.
Izoh (0)