Тошкент вилояти Зангиота тумани Ихтисослаштирилган кўп тармоқли юқумли касалликлар шифохонасида айни пайтда 10 ёшдан 13 ёшгача бўлган 125 нафар бола даволанмоқда. Бу ҳақда Зангиота 1-сон юқумли касалликлар шифохонаси реанимация бўлими бошлиғи Пётр Комиренко «Ўзбекистон 24» телеканалига берган интервьюсида маълум қилди.
«Бизда 160 ўринли иккита болалар бўлими мавжуд. Ҳозирда 125 нафар бола даволанмоқда. Улар орасида пневмония бўлганлар ҳам, касалликни оғир ўтказаётганлар ҳам бор. Агар касалланганлар тўлқини ўтган йилдагидек бўладиган бўлса, касалхонада иккита алоҳида блокда мингта койка заҳираланган. Улар аппаратлардан тортиб керакли тиббиёт ходимигача тўлиқ жиҳозланган бўлиб, фойдаланишга тайёр ҳолда», — дея унинг сўзларини келтирган «Podrobno.uz».
Унинг сўзларига кўра, касалхонага асосан 12-13 ёшлардаги болалар олиб келинмоқда, 10 ёшли болалар ҳам бор. Уларнинг айримлари айни пайтда реанимация бўлимида ётган бўлиб, интенсив даволанишга муҳтож.
«Касалликнинг катталардаги клиник белгилари деярли ўзгармаган, касалликнинг оғирлик даражаси ўтган йилдаги каби. Аммо фарқи шундаки, вирус яшариб бормоқда», — деган у.
Шифокорнинг таъкидлашича, касалхона 3 ойга етадиган барча зарур дори-дармонлар билан тўлиқ таъминланган.
Маълумот учун, Ўзбекистонда 6 май куни яна 421 кишида коронавирус инфекцияси тасдиқланиб, мамлакатда коронавирусга чалингани расман тан олинганлар сони 93 597 нафарга етди. Шу куни жами 37 158 нафар киши COVID-19’га қарши эмланиб, мамлакатда эмланганлар сони 1 миллиондан кишидан ошди.
Изоҳ (0)