Наманган вилоятидаги Поп йўлида 6 май куни соат 17:20 ларда сув тошқини оқибатида транспортлар ҳаракати чекланди. Бу ҳақда ЙҲХББ хабар берди.
Маълум қилинишича, вилоятнинг Поп тумани ҳудудидан ўтган 4Р 112 Фарғона ҳалқа йўли автомобиль йўлининг 10-17 километрлари оралиғида йўлнинг қатнов қисмига сув тошиб чиққани, 15-километри бўйлаб асфальт қопламасининг айрим жойларини кўчириб ташлагани, йўл ёқаси айрим жойлари чўкиб кетгани ҳамда қатнов қисми шағал билан қоплангани туфайли транспортлар ҳаракати чекланди.
Ҳозирги вақтда ҳаракат Поп тумани ҳудудидан ўтган 4Р 112 Фарғона ҳалқа йўли автомобиль йўлининг 36-километиридаги «Ором» айланма ҳаракати орқали 4Р 215 Поп маркази 4Р 121, 4Р 126 автомобиль йўллари бўйлаб А 373 Тошкент—Ўш автомобиль йўлининг «Садоқат» чорраҳаси кесишмаси орқали ташкил этилган.
Шунингдек, қўшимча қилинишича, ҳозирда Поп тумани марказидан ўтган 4Р 215 автомобиль йўли орқали қўшимча захира йўли тайёрланмоқда, ушбу йўналишнинг узунлиги 38 километрни ташкил этади.
Аввалроқ Наманганда 6 май куни юз берган сел Поп—Қўшминор 2 темир йўл бекатлари оралиғининг 106-километрида темир йўл изини лой аралашмаси кўмиб ташлагани сабабли поездлар ҳаракати чеклангани ҳақида хабар берилган эди.
«Ўзбекистон темир йўллари» 7 май куни Тошкент—Андижон йўналиши бўйича 60-сонли поезд рейси бекор қилинганини маълум қилганди. Йўловчилар сотиб олган чипталарнинг пули тўлиқ қийматда вокзаллар чиптахоналарида қайтарилади ёки бошқа санага алмаштирилиши мумкин.
Мазкур ҳолат Фарғона водийсига ва у ердан бошқа вилоятларга ҳаракатланаётган барча йўловчи поездларнинг ҳаракат жадвалига ҳам таъсир кўрсатиши мумкинлиги таъкидланган.
Изоҳ (0)