Toshkent viloyati Zangiota tumani Ixtisoslashtirilgan ko‘p tarmoqli yuqumli kasalliklar shifoxonasida ayni paytda 10 yoshdan 13 yoshgacha bo‘lgan 125 nafar bola davolanmoqda. Bu haqda Zangiota 1-son yuqumli kasalliklar shifoxonasi reanimatsiya bo‘limi boshlig‘i Pyotr Komirenko “O‘zbekiston 24” telekanaliga bergan intervyusida ma’lum qildi.
“Bizda 160 o‘rinli ikkita bolalar bo‘limi mavjud. Hozirda 125 nafar bola davolanmoqda. Ular orasida pnevmoniya bo‘lganlar ham, kasallikni og‘ir o‘tkazayotganlar ham bor. Agar kasallanganlar to‘lqini o‘tgan yildagidek bo‘ladigan bo‘lsa, kasalxonada ikkita alohida blokda mingta koyka zahiralangan. Ular apparatlardan tortib kerakli tibbiyot xodimigacha to‘liq jihozlangan bo‘lib, foydalanishga tayyor holda”, — deya uning so‘zlarini keltirgan “Podrobno.uz”.
Uning so‘zlariga ko‘ra, kasalxonaga asosan 12-13 yoshlardagi bolalar olib kelinmoqda, 10 yoshli bolalar ham bor. Ularning ayrimlari ayni paytda reanimatsiya bo‘limida yotgan bo‘lib, intensiv davolanishga muhtoj.
“Kasallikning kattalardagi klinik belgilari deyarli o‘zgarmagan, kasallikning og‘irlik darajasi o‘tgan yildagi kabi. Ammo farqi shundaki, virus yasharib bormoqda”, — degan u.
Shifokorning ta’kidlashicha, kasalxona 3 oyga yetadigan barcha zarur dori-darmonlar bilan to‘liq ta’minlangan.
Ma’lumot uchun, O‘zbekistonda 6-may kuni yana 421 kishida koronavirus infeksiyasi tasdiqlanib, mamlakatda koronavirusga chalingani rasman tan olinganlar soni 93 597 nafarga yetdi. Shu kuni jami 37 158 nafar kishi COVID-19’ga qarshi emlanib, mamlakatda emlanganlar soni 1 milliondan kishidan oshdi.
Izoh (0)