Тошкент давлат юридик университети 10 майдан масофавий таълимга ўтади. Бу ҳақда университет матбуот хизмати хабар берди.
Қайд этилишича, республикадаги эпидемиологик вазиятни инобатга олган ҳолда талабаларни асраб-авайлаш, касалликдан сақлаш мақсадида университет 14 кунга онлайн таълимга ўтмоқда.
Онлайн дарслар distant.tsul.uz масофавий таълим платформаси орқали олиб борилади.
Аввалроқ Тошкент молия институти 6 майдан 20 майгача, Самарқанд давлат чет тиллар институти эса ўқув йили охиригача масофавий таълимга ўтказилгани ҳақида хабар берилган эди. Ундан аввал талабалар орасида коронавирус инфекцияси аниқлангани сабабли яна учта — Тошкент давлат техника университети, Самарқанд шаҳридаги Ипак йўли туризм халқаро университети, Андижон қишлоқ хўжалиги ва агротехнологиялар институти масофавий таълим тизимига ўтказилганди.
Маълумот учун, Ўзбекистонда 5 май куни коронавирус инфекциясини юқтириб олиш билан боғлиқ 452 та янги ҳолат рўйхатга олинди — бу кунлик касалланиш бўйича 2021 йилнинг энг юқори кўрсаткичидир.
Изоҳ (0)