Давлат активларини бошқариш агентлиги 2020 йил якуни бўйича молиявий ҳисоботлар таҳлилида «Пахтакор» футбол клубини энг кўп зарар кўрган 10 корхона таркибига киритди.
Унда 2020 йилда «Пахтакор» футбол клубининг 82,7 млрд сўм миқдорида зарар кўргани қайд этилган. «Пахтакор» матбуот хизмати ушбу маълумотнома юзасидан расмий баёнот билан чиқди.
«Пахтакор футбол клуби» МЧЖ Ўзбекистон Республикаси Президентининг 2017 йил 21 августдаги 3227-сонли «‘Пахтакор’ футбол клубининг моддий-техника базасини янада такомиллаштириш чора-тадбирлари тўғрисида»ги қарорига кўра, инвестиция шартларини бажарган ҳолатда 80 фоиз улуши SFI Management Group МЧЖга ўтиши ва клубнинг устав фондидаги 20 фоиз улушини Тошкент шаҳар ҳокимлигида сақлаб қолиш тўғрисидаги таклиф маъқулланган. Шу вақтдан буён «Пахтакор» футбол клуби бюджети тўлиғича SFI Management Group МЧЖ томонидан шакллантириб келинган. «Пахтакор» футбол клуби ўтган йиллар мобайнида давлат бюджетидан умуман маблағ олмаганлигини маълум қиламиз.Таниқли футбол мутасаддиси Алишер Никимбаевнинг хабар қилишича, «Пахтакор» клуби 2018—2020 йиллар тўлиқ SFI Management Group томонидан молиялаштирилган. 2021 йилнинг март ойидан бошлаб ушбу компания «Пахтакор» аксионерлари рўйхатидан чиққан.Давлат активларини бошқариш агентлиги тарқатиш учун тайёрлаган маълумотларининг тўғри ва холис экани бўйича мажбуриятга эгалигини унутмаслиги лозим.
«Пахтакор» клуби
SFI Management Group кимга тегишли?
2018 йил августида компания Ўзбекистондаги лойиҳаларга Алишер Усмонов ҳомийлигида жалб қилингани ҳақида хабар берилганди. Кейинчалик тадбиркор СФИънинг эгаси Фаттоҳ Шодиэв эканлигини рад этган, аммо унинг акаси ва дўстининг оиласига тегишли эканлигини билдирган.
Ҳозирда компания сайтида Ўзбекистондаги фақат иккита лойиҳа — «Пахтакор» ФК ва «Тошкент металлургия заводи» кўрсатилган. Аввалроқ рўйхатда Euroasia Insurance, «Ўртачирчиқпарранда» ва «Ўзкимёфарм» ҳам бўлган.
Маълумот учун, SFI Management Group МЧЖ хорижий корхонаси корхоналарни бозор муносабатларига мослаштириш, халқаро стандартларни жорий этиш, хорижий мутахассислар ва инвестицияларни жалб қилишда фаол иштирок этиш орқали Ўзбекистоннинг иқтисодий ривожланишига ҳисса қўшиш мақсадида ташкил этилган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)