Қашқадарё вилоятининг Китоб туманидаги 5-сонли меҳрибонлик уйи тарбияланувчилари Қамаши туманидаги 4-сонли меҳрибонлик уйига кўчирилди. Бу ҳақда Сенат матбуот хизмати хабар берди.
Эслатиб ўтамиз, Болалар омбдусмани Қашқадарёда жойлашган 5-меҳрибонлик уйидаги шароитларни танқид қилганидан сўнг ушбу меҳрибонлик уйи директори ишдан олиниб, бир қатор масъуллар жавобгарликка тортилганди. Китоб туман ҳокимияти матбуот хизмати 2020 йилнинг февралидаёқ халқ таълими вазири Шерзод Шерматов мазкур муассасани ёпиш таклифи билан чиққанини маълум қилди.
Сенатнинг Фан, таълим ва соғлиқни сақлаш масалалари қўмитаси ишчи гуруҳи тавсиясига асосан, 2 май куни Китоб туманидаги 5-сонли меҳрибонлик уйи 65 нафар тарбияланувчисининг 10 нафари яқин қариндошлари оиласига, 55 нафари Қамаши туманидаги 4-сонли меҳрибонлик уйига кўчирилди.
Китоб тумани ҳокимлиги матбуот хизмати тарбияланувчилар кўчирилиши акс этган видеони эълон қилди. Тарбияланувчилар 4-сонли меҳрибонлик уйидаги шароитлардан мамнунлиги айтилмоқда.
Изоҳ (0)