Ўзбекистонда январь—март ойларида 1491 та йўл-транспорт ҳодисаси қайд этилган. Унда 394 киши ҳалок бўлган ва 1168 киши жароҳат олган, деб хабар қилди ЙҲХББ.
Йўл-транспорт ҳодисаларининг аксарияти Фарғона вилоятида (210 та), Тошкент вилоятида (208 та) ва Тошкент шаҳрида (170 та) қайд этилган.
620 та автоҳалокат пиёдалар иштирокида содир бўлган, 162 таси велосипедчи, 95 таси болалар, 10 таси мотоциклчилар иштирокида содир бўлган.
Бахтсиз ҳодисаларнинг асосий сабаблари тезликни ошириш — 37,8 фоиз, пиёдалар ўтиш жойлари йўқлиги сабабли йўлни белгиланмаган жойдан кесиб ўтиш — 15,3 фоиз, устунликка эга транспортга йўл бермаслик — 12,4 фоиз, қарама-қарши йўналишга чиқиб кетиш — 7,6 фоиз.
Йўл-транспорт ҳодисаларининг «объектив сабаблари» қаторида транспорт воситаларини нотўғри бошқариш ва сифатсиз йўллар 4,2 фоизни, шунингдек, велойўлаклар бўлмаган жойларда велосипедчиларни уриб кетиш 4,2 фоизни ташкил этган.
Ҳайдовчининг тажрибасизлиги барча бахтсиз ҳодисаларнинг 5,8 фоизига сабаб бўлган, ҳаракат давомида ухлаб қолиш – 3,3 фоиз ва транспортни маст ҳолда бошқариш 2,6 фоиз ЙТҲга сабаб бўлган.
Бундан аввал Асакада Labo тўхтаб турган «ГАЗ-53» юк машинасига бориб урилгани, Чинозда Damas ЙПХ инспекторининг радар ўрнатилган Nexia’сига бориб урилгани ҳамда Тошкентда Captiva Nexia ва «Москвич»га бориб урилиши оқибатида бир киши ҳалок бўлгани ҳақида хабар берилганди.
Изоҳ (0)