Наманганда 96 та хонадон жойлашган тўртта кўп қаватли уй томига умумий қуввати 58 киловатт бўлган қуёш панеллари ўрнатилди, деб хабар бермоқда Энергетика вазирлиги матбуот хизмати.
Маълум қилинишича, лойиҳа Sun-Hightech МЧЖ томонидан БМТнинг PROON/GEF лойиҳаси ёрдамида Ўзбекистон Қурилиш вазирлиги билан биргаликда «Ўзбекистон Республикаси қишлоқ жойларида энергия тежамкор уй-жой қурилишини ривожлантиришга кўмаклашиш» дастури доирасида амалга оширилди.
Уйчи туманидаги тўрт қаватли янги уйларга жами 192 та қуёш панеллари ўрнатилган. Мазкур қуёш электр станциялари хонадонлардаги маиший техникалар, жумладан, ёритиш чироқлари, телевизор, музлаткич, компьютер каби электр жиҳозларини марказий электр таъминотидан алоҳида, мустақил (автоном) равишда таъминлаш имконини беради.
Ушбу қуёш электр станцияларига узлуксиз равишда техник хизмат кўрсатиш мақсадида мазкур кўп қаватли уйларда яшовчи ёш мутахассис доимий равишда ишга қабул қилинган.
БМТ томонидан амалга оширилаётган 1 миллиард 320 миллион сўмлик ушбу грант лойиҳа доирасида Ўзбекистоннинг 5 та ҳудуди қамраб олинади. Жумладан, Наманган вилоятидан ташқари, Қорақалпоғистон Республикаси, Тошкент, Бухоро ва Қашқадарё вилоятларида ҳам қуёш панеллари ўрнатилади.
Эслатиб ўтамиз, Шавкат Мирзиёев 2020 йилнинг май ойида ўтказилган йиғилишда қайта тикланувчи энергия манбалари Ўзбекистонда ҳали тўла фойдаланилмаётган улкан резервлардан бири эканлигини айтганди.
«Албатта, бу йўналиш бошида катта харажат талаб қилади. Лекин бу келажакда табиий газ ва нефть танқислигини ҳал қилиш, истеъмолчилар учун эса сарф-харажатларни камида 2 баробар тежаш имконини берса, ўзини оқлайди. Мисол учун, агар 150 мингта хонадонга қуёш панеллари ва сув иситиш тизимлари ўрнатилса, йилига 319 миллион куб метр табиий газни тежаса бўлади», — деган эди Президент.
2020 йилнинг январида Россиянинг «Ренова» компаниялар гуруҳи Ўзбекистонда қуёш панеллари ишлаб чиқариш бўйича қўшма корхона тузишни таклиф қилганди.
Изоҳ (0)