Соғлиқни сақлаш вазири ўринбосари – Санитария-эпидемиологик осойишталик ва жамоат саломатлиги хизмати бошлиғи, бош давлат санитария врачи Баҳодир Юсупалиев 3 май куни коронавирус инфекциясига қарши ZF-UZ-VAC2001 вакцинаси билан эмланди. Бу ҳақда вазирлик матбуот хизмати хабар қилди.
«Аҳолини оммавий эмлаш жараёнлари босқичма-босқич амалга оширилмоқда. Мана, мен ҳам коронавирусга қарши вакцина билан эмландим. Бу билан ўзим, оила аъзоларимнинг саломатлигини ҳимоя қилишим мумкин», – деди Баҳодир Юсупалиев.
Айни пайтгача Ўзбекистонда вирусга қарши эмланган фуқаролар сони 856 016 нафарга етди.
Эслатиб ўтамиз, 1 майдан Ўзбекистонда вакцинациянинг иккинчи ойи бошланди. Вакцинациянинг биринчи босқичи 1 апрелдан бошланганди. Дастлабки босқичда 65 ёшдан катталар, сурункали касаллиги борлар, тиббиёт ва таълим муассасалари (мактаб ва боғча) ходимлари, шунингдек, ҳуқуқ-тартибот органлари вакиллари эмланганди.
Иккинчи босқичда эмланадиганлар:
- журналистлар, блогерлар ва ОАВ вакиллари;
- жамоат транспорти ходимлари (метрополитен, темир йўл, аэропорт ходимлари);
- хорижда ўқийдиган талабалар,
- меҳнат муҳожирлари.
Изоҳ (0)