Шавкат Мирзиёев Тожикистон—Қирғизистон чегарасидаги вазият бўйича эришилган келишувларни қўллаб-қувватлади

Шавкат Мирзиёев 30 апрель куни Тожикистон президенти Эмомали Раҳмон билан телефон орқали мулоқот қилди, деб хабар бермоқда Президент матбуот хизмати.

Қайд этилишича, давлат раҳбарлари Тожикистон-Қирғизистон чегарасидаги вазиятнинг ривожланишини муҳокама қилди.

Шавкат Мирзиёев юзага келган вазиятни тез фурсатда ҳал қилиш ва унинг кескинлашувига йўл қўймаслик бўйича Тожикистон ва Қирғизистон томонлари эришган келишувларни қўллаб-қувватлади.

Мавжуд барча масалалар дўстлик, яхши қўшничилик ва шериклик муносабатлари руҳида, фақат музокаралар ва маслаҳатлашувлар йўли билан ҳал қилиниш муҳим экани таъкидланди.

Шунингдек, Тожикистонга бўлажак олий даражадаги ташрифга тайёргарликнинг бориши ҳам кўриб чиқилган. Мамлакатлар бош вазирлари ўтган ҳафта Хўжанд шаҳрида ўтказган амалий учрашувнинг самарали натижалари мамнуният билан қайд этилган.

Ўзбекистон ва Тожикистон ўртасида узоқ муддатли истиқболга мўлжалланган кенг кўламли ҳамкорликнинг янги «ўсиш нуқталари»ни биргаликда аниқлаш муҳимлиги алоҳида таъкидланган.

Эслатиб ўтамиз, Қирғизистон ва Тожикистон чегарасидаги низо Исфара дарёси юқори оқимларидаги «Головной» сув тақсимлаш пункти яқинида бошланди, мазкур жойни иккала давлат вакиллари ҳам ўзлариники деб ҳисоблайди. 29 апрелда икки давлат ҳарбийлари ўртасида отишма содир бўлган. 30 апрель куни Қирғизистон президенти Тожикистон билан чегарадаги вазият барқарорлашганини маълум қилди. Қирғизистон Соғлиқни сақлаш вазирлигининг сўнгги маълумотларига кўра, можарода жабрланганлар сони 134 кишига етди, 13 киши вафот этди.